अन्तर्राष्ट्रिय
ट्वान्टी ट्वान्टी विश्वकप : फाइनल पुग्न पाकिस्तानले अष्ट्रेलियालाई दियो १७७ रनको लक्ष्य
Published
2 years agoon
By
wesportzमोहम्मद रिजवान र फखार जमानले अर्धशतकीय पारी खेले पछि युएईमा जारी ट्वान्टी ट्वान्टी विश्वकप अन्तर्गत दोश्रो सेमिफाइनल खेलमा पाकिस्तानले अष्ट्रेलियालाई १७७ रनको चुनौतिपूर्ण लक्ष्य दिएको छ ।
खेलमा टस हारेर पहिले ब्याटिङ गरेको पाकिस्तानले पुरै २० ओभर खेल्दै चार विकेटको नोक्सानीमा १७६ रन बनायो ।
पाकिस्तानको तर्फबाट ओपनर मोहम्मद रिजवानले मिचेल स्टार्कको बलमा आउट हुनु अघि सर्वाधिक ६७ रन बनाए भने अविजित रहेका जमानले ५५ रनको पारी खेले । ५२ बलको सामना गरेका उनले तीन चौका र चार छक्का प्रहार गरे । रिजवानले पहिलो विकेटका लागि कप्तान बाबर आजमसँग मिलेर १० ओभरमा ७१ रनको साझेदारी गर्दै पाकिस्तानलाई राम्रो सुरुवात दिलाए । ३४ बल खेल्दै आजमले पाँच चौकाको मद्दतमा ३९ रन बनाएर एडम जाम्पाको शिकार हुन पुगे ।
बाबरको विकेटको पतन पछि क्रिजमा आएका फखार जमानले रिजवानसँग मिलेर पाकिस्तानको पारी सम्हाले । रिजवान र फखार भएर दोश्रो विकेटका लागि सात दशमलब दुई ओभरमा ७२ रनको साझेदारी गर्दै पाकिस्तानलाई ठुलो योगफल तर्फ लगे ।
यस अघिका खेलमा खासै राम्रो प्रदर्शन गर्न नसकेका जमानले ३३ बलमा तीन चौका र चार छक्का प्रहार गर्दै पाकिस्तानलाई ठुलो स्कोर सम्म पुर्याए । अन्तिम तीन ओभरमा पाकिस्तानले एक छोडबाट लगातार विकेट गुमाए पनि उनले एक चौका र तीन छक्का प्रहार गर्दै जारी विश्वकपमा आफ्नो पहिलो अर्धशतक पनि पुरा गरे ।
पाकिस्तानका सोएब मलिक १ तथा आसिफ अली गोल्डेन डकआउट हुन पुगे भने मोहम्मद हफिज एक रनमा अविजित रहे ।
अष्ट्रेलियाका मिचेल स्टार्कले सर्वाधिक दुई विकेट लिए भने प्याट कमिन्स र एडम जाम्पाले समान १-१ विकेट आफ्नो नाममा दर्ता गराए ।
पाकिस्तान जारी विश्वकपमा एक मात्र अपराजित टोली हो । पाकिस्तान समुह चरणका पाँच खेल मध्य पाँचवटामा नै जित निकाल्दै समुह २ को विजेता हुँदै सेमिफाइनलमा प्रवेश गरेको हो भने समुह चरणका चार खेलमा जित पारेको अष्ट्रेलिया समुह १ को विजेताका रुपमा सेमिफाइनलमा प्रवेश गरेको हो । समुह १ मा इंग्ल्यान्ड, अष्ट्रेलिया र दक्षिण अफ्रिका तीनवटै टोलीको समान ८-८ अंक रहे पनि इंग्ल्यान्ड र अष्ट्रेलियाले राम्रो रन रेटका आधारमा समुह विजेता र उपविजेता हुँदै सेमिमा स्थान सुरक्षित गरेका हुन् ।
आज हुने दोश्रो सेमिफाइनलको विजेताले उपाधिका लागि न्युजिल्यान्डको सामना गर्नेछ । हिजो सम्पन्न पहिलो सेमिफाइनलमा इंग्ल्यान्ड माथि पाँच विकेटको सनसनीपूर्ण जित निकाल्दै न्युजिल्यान्डले फाइनलमा आफ्नो स्थान पक्का गरेको हो ।
ट्वान्टी ट्वान्टीको तथ्यांक हेर्ने हो भने अष्ट्रेलिया माथि पाकिस्तान नै हाबी छ । समग्रमा २२ पटक एक आपसमा भिड्दा पाकिस्तानले १३ खेलमा जित दर्ता गर्दा अष्ट्रेलियाले नौ खेल मात्र आफ्नो पक्ष्यमा पार्न सफल भएको छ । ट्वान्टी ट्वान्टी विश्वकपमा भने दुबै टोली बराबरीमा रहेका छन् । विश्वकपमा ६ पटक खेल्दा दुबै टोलीले समान ३-३ जित आफ्नो नाममा लेखाएका छन् ।
आज सेमिफाइनलमा अष्ट्रेलियासँग भिड्दा पाकिस्तानलाई पक्कै पनि सन् २०१० मा आयोजना भएको ट्वान्टी ट्वान्टी विश्वकपको यादले सताउने छ । सन् २०१० मा सम्पन्न विश्वकपमा पाकिस्तान जित नजिक रहेको अवस्थामा पनि हारको सामना गर्दा लगातार तेश्रो फाइनल खेल्ने सपनामा तुसारोपात लागेको थियो ।
खेलमा पहिले ब्याटिङ गरेको पाकिस्तानले ६ विकेट गुमाएर १९१ रनको विशाल योगफल बनायो । जबाफी ब्याटिङ गरेको अष्ट्रेलियाले सात विकेट गुमाएर एक बल अगावै लक्ष्य पार गर्यो र पहिलो पटक ट्वान्टी ट्वान्टी विश्वकपको फाइनलमा प्रवेश गर्यो ।
अष्ट्रेलियाले १७ दशमलब एक ओभरमा सात विकेट गुमाएर हारको अवस्थामा पुगे पनि माइकल हस्सीले अन्तिम १७ बलमा ५३ रन जोड्दै तीन विकेटको सनसनीपूर्ण जित दिलाए । २४ बलको सामना गरेका हस्सीले तीन चौका र छ छक्काको मद्धतमा अविजित ६० रनको पारी खेले ।
You may like
Headline
कोहलीको उत्कृष्ट पारीमा पाकिस्तान माथि भारतको सनसनीपूर्ण जित
Published
1 year agoon
October 23, 2022By
wesportzविराट कोहलीले अविजित रहँदै अर्धशतकीय पारी खेल्दा अष्ट्रेलियामा जारी ट्वान्टी ट्वान्टी विश्वकपको आफ्नो पहिलो खेलमा भारतले चिरप्रतिद्वन्द्वी पाकिस्तान माथि चार विकेटको सनसनीपूर्ण जित हात पारेको छ ।
कोहलीले अविजित रहँदै ८२ रन जोड्दा पाकिस्तानले दिएको १६० रनको लक्ष्य भारतले अन्तिम बलमा ६ विकेट गुमाएर लक्ष्य पार गर्यो ।
ओपनरद्वय केएल राहुल र कप्तान रोहित शर्मा समान ४-४ रन जोड्दै पेभेलियन फर्किए पनि कोहलीले अर्को छोडबाट रन जोड्दै गत विश्वकपमा पाकिस्तानसँगको हारको बदला लिन सफल रहे । ५३ बलको सामना गरेका कोहलीले छ चौका र चार छक्काको मद्धतमा अविजित रहँदै सर्वाधिक ८२ रन जोडेका हुन् ।
सातौँ ओभरमा ३१ रनमा चार विकेट गुमाएर खराब सुरुवात गरेको भारतको जितमा कोहलीले पाँचौं विकेटका लागि ३७ बलमा ४० रन बनाएका हार्दिक पाण्ड्यासँग मिलेर
७८ बलमा ११३ रनको साझेदारी गरे । भारतका अन्य ब्याटरहरुमा सुर्य कुमार यादव १५, अक्सर पटेल दुई, दिनेश कार्तिक एक तथा रविचन्द्रन आश्विन एक रनमा अविजित रहे ।
पाकिस्तानका ह्यारिस रौफ र मोहम्मद नवाज महँगो सावित रहे पनि समान २-२ विकेट तथा नसिम शाहले चार ओभरमा २३ रन दिएर एक बिकेट हात पारे भने शाहिन शाह अफ्रिदीले चार ओभरमा ३४ रन खर्चंदा विकेट बिहिन रहन पुगे ।
यस अघि खेलमा टस हारेर पहिले ब्याटिङ गरेको पाकिस्तानले पुरै २० ओभर खेल्दा आठ विकेट गुमाएर १५९ रन मात्र जोड्न सक्यो ।
कप्तान बाबर आजम गोल्डेन डकआउट तथा मोहम्मद रिजवान चार रनमा आउट भए पनि तेश्रो र चौथों नम्बरमा ब्याटिङ गर्न आएका शान मसूद र इफ्तिखर अहमदले अर्धशतकीय पारी खेल्दै पाकिस्तानलाई सम्मानजनक योगफल सम्म डोर्याए । अविजित रहेका मसूदले ४२ बलमा सर्वाधिक ५२ तथा अहमदले ३४ बलमा ५१ रन बनाए ।
पाकिस्तानलाई मध्यम स्कोरमा रोक्ने क्रममा अर्शदिप सिंह र हार्दिक पान्ड्याले समान ३-३ विकेट लिए भने मोहम्मद शामी र भुवनेश्वर कुमारले समान १-१ विकेट आफ्नो नाममा दर्ता गराए ।
अन्तर्राष्ट्रिय
ट्वान्टी ट्वान्टी विश्वकपमा चिरप्रतिद्वन्द्वी पाकिस्तान र भारत भिड्दै
Published
2 years agoon
October 23, 2022By
wesportzअष्ट्रेलियामा जारी ट्वान्टी ट्वान्टी विश्वकप अन्तर्गत चिरप्रतिद्वन्द्वी भारत र पाकिस्तान भिड्दै छन् । मेलबर्नमा हुने खेल नेपाली समय अनुसार दिउँसो १:४५ बजे सुरु हुनेछ ।
राजनैतिक दबाबका कारण भारत र पाकिस्तान बीच कुनै पनि शृंखला आयोजना हुँदैन । यी दुई टोली एक आपसमा भिड्ने भनेको आईसीसी अथवा एसीसीले आयोजना गर्ने प्रतियोगितामा मात्र हो । त्यसैले गर्दा पनि भारत र पाकिस्तान बीचको खेलमा समग्र क्रिकेट समर्थकहरूको आँखा जाने गरेको छ ।
भारत र पाकिस्तान बीचको पछिल्लो भिडन्त एसिया कपमा भएको थियो । दुई खेल मध्य भारतले एक खेलमा जित निकाल्दा पाकिस्तानले अर्को खेलमा जित निकाल्न सफल भएको थियो । एसिया कपको समुह चरणको खेलमा पाकिस्तान माथि पाँच विकेटको जित निकालेको भारत सुपर ४ मा पाँच विकेटले पराजित हुँदा फाइनल खेल्नबाट बञ्चित भएको थियो ।
यस अघि गत वर्ष अक्टोबरमा युएईमा सम्पन्न भएको ट्वान्टी ट्वान्टी विश्वकपमा भारत पाकिस्तानसँग १० विकेटको फराकिलो हारको सामना गर्न बाध्य भएको थियो । पाकिस्तानसँग पराजित हुँदा भारतको सेमिफाइनल खेल्ने सपना सपनामा नै सीमित हुन पुग्यो ।
भारत र पाकिस्तानको खेल हुने मैदान मेलबर्न क्रिकेट ग्राउण्डमा एक लाख भन्दा बढी समर्थक अट्छ । तर आजको खेलमा मैदानमा गएर खेल हेर्ने समर्थकहरूको आशा निराशामा परिणत हुने प्रबल सम्भावना रहेको छ । मौसम विभागका अनुसार मेलबर्नमा वर्षा बाधक बन्ने सम्भावना धेरै रहेका कारण भारत र पाकिस्तानको खेल प्रभावित हुन सक्ने छ ।
आजको खेलमा जित निकाल्दै दुबै टोली उत्कृष्ट सुरुवात गर्ने सुरमा रहेका छन् । तर वर्षाका कारण दुबै टोली १-१ अंकमा नै सीमित रहने बढी सम्भावना छ ।
Headline
आठ पटकको च्याम्पियन जर्मनलाई हराउँदा इंग्ल्यान्डलाई पहिलो युरो कपको उपाधि
Published
2 years agoon
August 1, 2022By
wesportzआठ पटकको च्याम्पियन जर्मनीलाई पराजित गर्दै इंग्ल्यान्ड पहिलो पटक महिला युरो कपको उपाधि चुमेको छ । वेम्ब्लीमा भएको फाइनल खेलमा जर्मनी माथि २-१ गोल अन्तरको जित निकाल्दै इंग्ल्यान्डले पहिलो पटक ठुलो प्रतियोगिताको उपाधि हात पार्न सफल भयो ।
पहिलो हाफ गोल रहित बराबरीमा सकिएको खेलको दोश्रो हाफमा दुबै टोलीले १-१ गोल गर्दा खेल अतिरिक्त समयमा पुगेको थियो । अतिरिक्त समयको २० मिनेटमा सब्सटिच्युटमा आएकी क्लोई केलीले गोल गर्दै ८७ हजार एक सय ९२ दर्शक सामु इङ्ल्यान्डलाई उपाधि दिलाएकी हुन् ।
Absolute scenes! ? pic.twitter.com/EV5Wzvf4U3
— Lionesses (@Lionesses) July 31, 2022
दोश्रो हाफको ६२ औँ मिनेटमा एला टोनीले गोल गर्दै इङ्ल्यान्डलाई अग्रता दिएकी थिइन् भने ७९ औँ मिनेटमा लिना मागलले बराबरी गोल गर्दै जर्मनीलाई खेलमा फर्काउन सफल भइन् ।
इंग्लिस फुटबल पुरुष र महिला कुनै पनि टोलीले जितेको यो पहिलो ठुलो ट्रफी हो । यस अघि ५६ वर्ष अघि इङ्ल्यान्डले वेस्ट जर्मनीलाई पराजित गर्दै सन् १९६६ मा आयोजना भएको विश्वकपको उपाधि जितेको थियो ।