साफ च्याम्पियनसिप इतिहासमा पहिलो पटक फाइनल खेलमा दुवै टोलीको प्रमुख प्रशिक्षक नुहने भएका छन् । शनिबार मालेमा नेपाल र भारत उपाधिका लागि भिड्दा अब्दुल्लाह अल्मुताइरी र इकोर स्टिम्याक दुवै हुने त छैनन् नै सँगै दुवै टोलीलाई महत्वपूर्ण खेलाडीहरुको अभाव हुनेछ ।
आफ्नै नियम मिच्दै दक्षिण एसियाली फुटबल फेडेरेसन (साफ) ले नेपालका प्रशिक्षक अब्दुल्लाहलाई फाइनलका लागि प्रतिबन्ध लगाउदै अन्यायपूर्ण व्यवहरा गरेको हो भने भारतीय प्रशिक्षक स्टिम्याकले यसअघि माल्दिभ्सबिरुद्धको खेलमा रेड कार्ड पाएका थिए ।
अब्दुल्लाहलाई दुई फरक फरक खेलमा पहेलो कार्ड पाएको भन्दै फाइनलका लागि प्रतिबन्ध लगाएको हो । साफ नियमावली अनुसार दुई पहेलो कार्डले खेलाडी अर्को खेलमा प्रतिबन्धित हुने भएपनि अफिसियलहरुको हकमा भने यो लागु हुँदैन । अब्दुल्लाहले श्रीलंका र बंगलादेशबिरुद्धको खेलमा पहेलो कार्ड पाएका थिए ।
पहिलो पटक साफ च्याम्पियनसिपको फाइनलमा स्थान बनाएको नेपालका लागि मिडफिल्डर अञ्जन बिष्ट पनि हुने छैनन् । उनले बंगलादेशबिरुद्धको खेलमा प्रतियोगिताको दोश्रो पहेलो कार्ड खाएपछि फाइनल गुमाएका हुन् ।
बंगलादेशसँग बराबरी गर्ने क्रममा अञ्जनले सातौं अन्तर्राष्ट्रिय गोल गरेका थिए
तर प्रमुख खेलाडीहरुको सबैभन्दा ठूलो अभाव भारतलाई नै हुने देखिन्छ । भारतका लागि प्रमुख डिफेन्डर सुभासिस बोस दोहोरो पहेलो कार्डका कारण खेलमा उपस्थिति हुने छैनन् भने मिडफिल्डर ब्रान्डन फर्नान्डेस र फर्वार्ड फारुख चौधरी चोटका कारण बाहिरिएका छन् ।
नेपाल २८ बर्षपछि भारतसँग सिनियर फुटबलमा भिड्न गइरहेको हो । नेपालले पछिल्लो पटक भारतलाई १९९३ को दक्षिण एसियाली खेलकुदको पुरुष फुटबलमा हराएको थियो । त्यही नै नेपालको भारतमाथि अहिलेसम्मको दुई मध्येको एक जित हो ।
नेपालले भारत २३ औं पटक अन्तर्राष्ट्रिय फुटबलमा भिड्न गइरहेका हुन् । २३ मा भारतले १५ पटक जित हात पारेको छ भने पाँच पटक बराबरी भएको छ ।
नेपालले ८ बर्षअघि दशरथ रँगशालामा भएको साफ च्याम्पियनसिपमा २–१ ले जित हात पारे यता अहिलेसम्म भारतलाई हराउन सकेको छैन ।
जारी प्रतियोगिताको लिग चरणमा नेपाल भारतसँग १–० ले पराजित भएको थियो । शुरुवाती दुई खेल बराबरी गरेको भारतले त्यसपछि पुनरागमन गर्दै समुह बिजेताकै रुपमा फाइनल प्रवेश गरेको हो ।
मुम्बई इन्डियनले १५ औँ संस्करणको इन्डियन प्रिमियर लिग (आईपीएल) को अन्तिम लिग खेलमा दिल्ली क्यापिटल्स माथि पाँच विकेटको सहज जित निकाल्दा रोयल च्यालेन्जर्स बेंगलोरको भाग्य चम्किएको छ । प्लेअफमा प्रवेश पाउनका लागि आफ्नो अन्तिम लिग खेलमा मुम्बई माथि जित निकाल्नै पर्ने समीकरण रहे पनि हारको सामना गर्दा दिल्लीको प्लेअफ खेल्ने सपना चकनाचुर भएको छ । दिल्लीले हार्दा भाग्य चम्किएको बेंगलोरअंक तालिकामा चौथो स्थान हात पार्दै प्लेअफको यात्रा तय गर्यो ।
गुजरात टाइटान्स २० अंक सहित पहिलो, राजस्थान रोयल्स र लखनउ सुपर जायन्ट्सको समान १८-१८अंक रहे पनि नेट रन रेटका आधारमा राजस्थान दोश्रोर लखनउ तेश्रो तथा १६ अंक सहित बेंगलोर चौथो हुँदै प्लेअफको टिकट काट्न सफल भएका छन् ।
दिल्लीले दिएको १६० रनको मध्यम लक्ष्य मुम्बईले १९ दशमलब एक ओभर खेल्दै पाँच विकेट गुमाएर जित दर्ता गरायो ।
मुम्बईका ओपनर तथा कप्तान रोहित शर्मा १३ बल खेल्दै मात्र दुई रन बनाएर आउट हुँदा खराब सुरुवात गरे पनि अर्का ओपनर इशानकिशनले ३५ बलमा ४८ तथा डेवाल्डब्रेविसले ३३ बलमा ३७ रनको पारी खेल्दै पारी सम्हाले । उनीहरुले ५१ रनको साझेदारी गर्दै आफ्नो टोलीलाई जित तर्फ लगे पनि उनीहरुको विकेटको पतन पछि मुम्बई १४ दशमलब तीन ओभरमा ९५ रनको अवस्थामा खुम्चिन पुग्यो ।
अन्तिम ३३ बलमा मुम्बईलाई ६४ रन आवश्यक रहेको अवस्थामा टिम डेविड र तिलक वर्माले २० बलमा ५० रन प्रहार गर्दै मुम्बईको जित सुनिश्चित गरे । डेविड ११ बल खेल्दै दुई चौका र चार छक्का सहित ३४ रन बनाएर आउट भए पनि वर्माले १७ बलमा अविजित २१ तथा रमनदिप सिंहले ६ बलमा १३ रन प्रहार गर्दा दिल्लीको प्लेअफको सपना तुहियो ।
दिल्लीका एनरिचनोर्किए र शार्दुल ठाकुरले समान २-२ तथा कुलदिप यादवले एक विकेट निकाले पनि आफ्नो टोलीलाई जित दिलाउन पर्याप्त रहेन ।
खेलमा टस हारेर पहिले ब्याटिङ गरेको दिल्लीले २० ओभरमा सात विकेट गुमाएर १५९ रनको मध्यम योगफल मात्र बनाउन सक्यो ।
दिल्लीको तर्फको रोवमन पावेलले सर्वाधिक ४३ रन बनाए भने कप्तान ऋषभ पन्तले ३९ तथा ओपनर पृथ्वी शले पनि २४ रनको पारी खेले । दिल्लीका ओपनर डेविड वार्नर पाँच तथा तेश्रो नम्बरमा ब्याटिङ गर्न आएका मिचेलमार्श गोल्डेन डकआउट भए । त्यस बाहेक सरफराज खान १०, शार्दुल ठाकुर चार रनमा पेभेलियन फर्कँदा अक्सर पटेलले १९ रनको योगदान दिए ।
मुम्बईका जस्प्रितबुम्राले सर्वाधिक तीन तथा रमनदिप सिंहले दुई विकेट हात पार्दा ड्यानियल साम्स र मायंकमार्कंडेले पनि समान १-१ विकेट आफ्नो नाममा दर्ता गराए ।
यस अघि नै शृंखला गुमाइसकेको नेपालले युगान्डा विरुद्ध लगातार दोश्रो जित हात पारेको छ । सुरुवाती तीन खेलमा हारको सामना गर्दा शृंखला गुमाएको नेपालले पाँचौं तथा अन्तिम खेलमा ३३ रनको जित निकाल्दा पाँच खेलको शृंखला ३-२ ले गुमाएको हो ।
नेपालले दिएको १२४ रनको लक्ष्य दिएर ब्याटिङमा आएको युगान्डाले पुरै २० ओभर खेल्दै ६ विकेट गुमाएर ९० रन मात्र बनाउन सक्यो ।
युगान्डाका रिटामुसमालीले सर्वाधिक २६, ओपनर केविनअविनोले १५, शाकिरा सादिकले अविजित १३ तथा जानेटएमबाबाजीले १० रन प्रहार गरे पनि जितका लागि पर्याप्त भएन ।
नेपालको जितमा इन्दु वर्मा र सिता राना मगरले समान २-२ विकेट हात पार्दा अस्मिना कर्माचार्य र हिरनमायी रोयले समान १-१ विकेट आफ्नो नाममा दर्ता गरे । समान ४-४ ओभर बलिङ गरेका इन्दुले १२, सिता राना मगरले १५ तथा रोयले १७ रन खर्चिए ।
यस अघि खेलमा टस हारेर पहिले ब्याटिङ गरेको नेपालले पुरै २० ओभर खेल्दै ६ विकेट गुमाएर १२३ रनको विशाल योगफल बनायो ।
नेपालको तर्फबाट कीर्तिमानी अर्धशतक बनाउनबाट एक रनले चुकेकी ज्योति पाण्डेले सर्वाधिक ४९ रन बनाइन् । अर्धशतक बनाउनका लागि सर्ट सिंगल लिने प्रयासमा रन आउट भएकी पाण्डेले ६१ बल खेल्दै तीन चौका प्रहार गरिन् । उनी घरेलु मैदानमा ट्वान्टी ट्वान्टी अन्तर्राष्ट्रिय खेलमा अर्धशतक बनाउने पहिलो खेलाडी बन्ने किर्तिमानबाट चुकेकी हुन् ।
ज्योति बाहेक नेपालको तर्फबाट कबिता जोशीले दुई चौका र एक छक्का सहित अविजित १८, ओपनर सिता राना मगरले १७ तथा अप्सरी बेगमले ११ रनको पारी खेले । त्यस बाहेक इन्दु वर्मा आठ रनमा आउट हुँदा कप्तान रुबिना क्षेत्री र डली भट्ट रनको खाता पनि नखोली रन आउट हुन पुगे ।
युगान्डाको तर्फबाट कोन्सीअवेको र फिओनाकुलुमेले समान १-१ विकेट हात पारे ।
टियु क्रिकेट मैदानमा नेपाली राष्ट्रिय महिला टोलीले पहिलो जित दर्ता गराएको छ । युगान्डा विरुद्धको शृंखला अन्तर्गत चौथो खेलमा नेपालले १५ रनको जित हात पारेको हो । पाँच खेलको शृंखलामा ३-० ले पछि पर्दै शृंखला गुमाइसकेको नेपालले चौथो खेल जित्दै शृंखला ३-१ को अवस्था पुर्याएको छ भने क्लिन स्विप हुनबाट पनि बचेको छ ।
खेलमा टस जितेर पहिले ब्याटिङ गरेको नेपालले १७ दशमलब पाँच ओभरमा खेल्दै आफ्ना सबै विकेट गुमाएर ९७ रन जोड्न सके पनि युगान्डाले पुरै १८ ओभर खेल्दै आठ विकेट गुमाएर ८२ रन मात्र बनाउन सक्यो । ढिला गरेर सुरु हुँदा खेल १८ ओभर प्रति टोलीमा घटाइएको थियो ।
युगान्डालाई रोक्ने क्रममा आजको खेलमा नेपालको लागि डेब्यु गरेकी हिरनमयी रोयले सर्वाधिक दुई विकेट हात पारिन् भने अस्मिना कर्माचार्य, रुबिना क्षेत्री र कविता कुँवरले समान १-१ विकेट आफ्नो नाममा दर्ता गराए । खेलको प्लेयर अफ द म्याच घोषित रोयले तीन ओभरमा ११ रन खर्चिन् । त्यस्तै अस्मिनाले दुई ओभरमा ६ रन दिँदा रुबिनाले चार ओभरमा १६ तथा कविताले तीन ओभरमा १७ रन खर्चिन पुगे ।
यस अघि नेपालको लागि विकेट किपर तथा ओपनर ज्योति पाण्डेले १३ बलमा सर्वाधिक १७, बिन्दु रावलले १६ तथा सिता राना मगरले ११ रनको पारी खेले भने अन्य कुनै पनि ब्याटरले दोहोरो अंकमा रन निकाल्न सकेनन् ।
नेपालका अन्य ब्याटरमा डली भट्ट, कविता कुँवर र अस्मिना कर्माचार्यले समान ६-६ रन जोडे भने, अप्सरी बेगमले चार, सरिता मगरले दुई, रुबिना क्षेत्री र इन्दु वर्माले१-१ रन भन्दा निकाल्न सकेनन् ।
युगान्डाकी जानेटएमबाबाजीले सर्वाधिक २१ रन जोडिन् भने अन्यले उल्लेख्य योगदान दिन सकेनन् । यस अघि कोन्सीअवेकोले तीन तथा साराहअकिटेङले दुई विकेट निकाल्दा नेपाल सामान्य योगफलमा नै रोकिएको थियो ।