सदिशाराजापाक्ष र चामिन्दुविक्रमासिङ्घेले शतकीय पारी खेले पछि यु १९ एसिया कप अन्तर्गत आफ्नो दोश्रो खेलमा नेपाललाई बलियो श्रीलंकाको ३२३ रनको विशाल लक्ष्य दिएको छ ।
खेलमा टस जितेर पहिले ब्याटिङ गरेको श्रीलंकाले पुरै ५० ओभर खेल्दै चार विकेटको नोक्सानीमा ३२२ रनको योगफल खडा गर्यो ।
३९ रनको अवस्थामा १७ रन शेवोन ड्यानियलको विकेट लिएर राम्रो सुरुवात गरेको नेपाल त्यस पछि भने सदिशा र चामिन्दुको ब्याटिङ अघि निरिह बन्न पुग्यो । श्रीलंकाको तर्फबाट ११९ बलमा सर्वाधिक १३१ रन बनाएका सदिशा र १२६ बलमा १११ रनको पारी खेलेका चामिन्दुले दोश्रो विकेटका लागि २२३ रनको साझेदारी गर्दै श्रीलंकालाई विशाल योगफल तर्फ डोर्याए । त्यस्तै श्रीलंकाका कप्तान दुनिथवेलालागेलले पनि अविजित रहँदै २४ बलमा ३४ रनको योगदान दिए ।
नेपालका आदिल अन्सारीले सर्वाधिक दुई विकेट लिए भने कप्तान देव खनाल र विवेक यादवले पनि आफ्नो नाममा समान १-१ विकेट दर्ता गराए ।
आफ्नो पहिलो खेलमा बंगलादेशसँग १५४ रनको फराकिलो हारको सामना गरेको थियो । जितका लागि २९८ रनको विशाल लक्ष्य पछ्याएको नेपालले कुनै पनि समय खेललाई आफ्नो नियन्त्रणमा राख्न सकेन र ४२ दशमलब तीन ओभर खेल्दै आफ्ना सबै विकेट गुमाएर १४३ रन मात्र बनाउन सक्यो ।