फ्रेन्च स्टार फुटबलर किलियन एमबाप्पे अन्तिम समयमा मैदान प्रवेश गरेपनि पेरिस सेन्ट जर्माइनका लागि एक सयौं गोल गर्न सपल भएका छन् ।
लिग वान अन्तर्गत शनिबार राति भएको खेलमा पिएसजीले मोन्टपेलियरलाई पराजित गर्दा एमबाप्पेले ७८ औं मिनेटमा गोल गरेपछि डिफेन्डिङ्ग च्याम्पियनले ३–१ को सहज जित हात पार्यो ।
अर्को हप्ता हुने च्याम्पियन्स लिग अन्तर्गत टर्किस टोली इस्तानबुल बसकसेहिरबिरुद्धको खेलका लागि ब्राजिलियन सुपरस्टार नेमारलाई बचाएर राखेको पिएसजीले एमबाप्पेलाई पनि शुरुवाती ११ मा खेलाएको थिएन । कोलिन दाग्बाले ३३ औं मिनेटमा आफ्नो पहिलो करिअर गोल गर्दै पिएसजीलाई ३३ औं मिनेटमै अग्रता दिलाएका थिए ।
इङ्गलिस फर्वार्ड स्टेफि माभिडिडिले पहिलो हाफ सकिनु अघि मोन्टपेलियरका लागि बराबरी गोल फर्काएका थिए । ७७ औं मिनेटमा रफिन्हाले काउन्टर अट्याकमा बनाएको मुभमा मोइजे किनले गोल गर्दै पिएसजीलाई फेरि अग्रता दिलाए । किनको सातौं लिग खेलमा पाचौं गोल गरेका हुन् ।
एक मिनेटपछि नै किनको ठाँउमा मैदान प्रवेश गरेका एमबाप्पेले लेभिन कुर्जार्वाको क्रसमा गोल गरेका थिए । एमबाप्पेलाई पिएसजीका लागि एक सयौं गोल गर्न सबै प्रतियोगिता गरेर १ सय ३७ खेल लागेको हो ।
पिएसजीको इतिहासमा सबैभन्दा बढी गोल गर्ने खेलाडीहरुको सुचिमा एमबाप्पे डोमिनिक रोचेतुसँगै संयुक्त रुपमा चौथो स्थानमा रहेका छन् । उरुग्वे फर्वार्ड एडिन्सन काभानीले पिएसजीका लागि सर्वाधिक २ सय गोल गरेका छन् भने स्विडिस लेजेण्ड ज्लाटन इब्राहिभोचि १ सय ५६ गोल सहित दोश्रो स्थानमा रहेका छन् ।
यस्तै पाउलेटो १ सय ९ गोल सहित तेश्रो स्थानमा छन् । लिग वानमै शनिबार भएको अर्को खेलमा लेन्ससँग २–० ले पराजित भएको रेनेसले पछिल्लो सात मध्ये ६ खेलमा पराजय व्यहोरेको छ ।