नेपाली युवा स्ट्राइकर राजेश परियारले भारतको आई लिगको दोश्रो डिभिजन क्लब अमदाबाद रकेट एकेडेमी (एआरए) एफसीमा अनुबन्ध हुनु व्यवसायकितातर्फको पहिलो पाइलको रुपमा लिएका छन् ।
राजेश एक महिनाको अन्तरमा भारतको दोश्रो श्रेणीको क्लबमा अनुबन्धित हुने दोश्रो युवा फुटबलर हुन् । गत महिना अर्का युवा स्ट्राइकर अभिषेक रिजाललाई बि डिभिजनकै क्लब मोहम्मदन स्पोर्टिङले अनुबन्ध गरेको थियो ।
अण्डर–२३ फर्वार्ड राजेश नेपालको लागि १३ औं सागको स्वर्ण बिजेता पनि हुन् भने उनी घरेलु लिगमा न्युरोड टिमका लागि खेल्ने गरेका छन् । “एआरएमा पुग्नु भएको मैले व्यवसायिकता तर्फ पहिलो पाइला चाले जस्तै हो । नेपाल भन्दा बहिर पहिलो पटक खेल्दै छु, म आफ्नो उत्कृष्ट प्रदर्शन गर्नेछु,” राजेशले विस्पोर्ट्जलाई बुधबार भने । “क्लबको मुख्य योजना आइ लिगमा उक्लिने रहेको छ । म पनि क्लबको योजना अनुसार खेल्ने छु ।”
एआरए एफसी भारतको गुजरातबाट व्यावसायिक फुटबल खेल्ने पहिलो क्लब हो । केही ठुलो भारतीय खेलाडीलाई समेटेर एआरएले यो पटक राम्रो टोली बनाएको छ । ठुलो क्लब र नेपालबाट बहिर खेल्न पाउदा आफ्नो खेलमा सुधार गर्दै अझै सिक्ने राजेश बताउछन् ।
“मलाई धेरै माथि जानु छ । यो मैले त्यहाबाट सिकेको कुराले मेरो खेलमा धेरै सुधार ल्याउने छ भन्ने आशा राखेको छु,” राजेश भन्छन् । राजेश बुधबार नै काकड्भिट्टा हुँदै भारत जाने छन् ।
राजेश एन्फा एकेडेमीका उत्पादन हुन् । २० बर्षिय राजेशले नेपालका लागि उमेर समुहका अन्य प्रतियोगिताहरु पनि खेलिसकेका छन् । दोस्रो डिभिजनको आइ लिगका लागि मिति तोकिएको छैन । २०१६ मा स्थापित भएको यो क्लबले पहिलो पटक आइ लिगको दोस्रो डिभिजन प्रतियोगिता खेल्न लागेको हो ।