२५ बर्षमा पहिलो पटक युरोपियन फुटबलमा उपस्थिति गुमाउने खतरामा रहेको आर्सनलले शनिबार चेल्सीलाई एफए कपको फाइनलमा २–१ ले पराजित गर्दै इज्जत बचाएको छ ।
च्याम्पियन्स लिगमा छनोट हुने दौडबाट बाहिरिसक्दा आर्सनल इङ्गलिस प्रिमियर लिगमा आठौं स्थानमा सिमित हुदा उसले युरोपा लिग पनि गुमाउने देखिएको थियो ।प्रिमियर लिगबाट युरोपा लिगबाट पुग्नका लागि पाचौं र छैटौं स्थान आवश्यक रहन्छ । तर आर्सनल दशकौं पछिको सबैभन्दा खराब स्थितिमा रहदा युरोपा गुमाउने खतरामा रहेको थियो ।
उसको लागि एक मात्र आशा एफए कपको उपाधि थियो र वेम्ब्लीमा भएको खेलमा उ सफल भयो । कप्तान पिएरे–एमेरिक औबामेयाङले दुई गोल गरेपछि आर्सनलले उपाधि चुम्यो र युरोपामा छनोट भयो । लिग सिजन खराब गएपनि आर्सनलले एफए कप जित्दै आफ्नो मात्र नभएर समर्थकहरुलाई पनि ठूलो राहत दिएको छ ।
अब आर्सनल समर्थकहरुले कम से कम हामी युरोपा लिग खेल्दैछौं भन्न त पाउनेछन् ।
फाइनलमा त्रिष्चियन पुलिसिचले पाचौं मिनेटमा गोल गर्दै चेल्सीलाई अग्रता दिलाए तर औबामेयाङले २८ औं मिनेटमा प्राप्त पेनाल्टीमा गोल गर्दै आर्सनललाई खेलमा फर्काए । ६७ औं मिनेटमा उनले दोश्रो गोल गरेपछि चेल्सीको ट्रफि जित्ने आशा समाप्त भएको थियो ।
अब दवाब चेल्सी र उसका समर्थकहरुलाई नै छ ।
यो सिजन उत्कृष्ट खेल खेलेका पुलिसिच घाइते हुदा चेल्सीलाई नराम्रो झट्का लागेको छ
चेल्सी यो सिजन ट्रफि बिहिन हुने संघारमा छ र यसको कारण हो च्याम्पियन्स लिगमा उसको स्थिति । प्रि क्वार्टरफाइनलको पहिलो लेगमा चेल्सी स्ट्यामफोर्ड ब्रिजमै ३–० ले हारेको थियो र उत्कृष्ट लयमा रहेको बायर्न बिरुद्ध अलायन्ज अरिनामा नतिजा उल्टाउन च्याम्पियन्स लिग इतिहासकै उत्कृष्ट कमब्याक खेल पस्किनु पर्नेछ ।
आर्सनलको जितले व्यवस्थापक मिकेल आर्टेटाले भने लामो सास फेरेका छन् । उनाई एमेरी व्यवस्थापक रहदा खासै केही गर्न नसकेको आर्सनललाई उसकै पुराना खेलाडी आर्टेटाले बचाउने अपेक्षा गरिएको थियो । लिगमा आर्टेटाले कुनै काया पलट गर्न नसकेपछि एफए कपको उपाधि जित्दै सम्मान फिर्ता ल्याएका छन् ।
आर्टेटालाई दवाब भने औबामेयाङलाई आर्सनलमै राख्नका लागि हुनेछ । बोरुसिया डर्टमण्डबाट साढे दुई बर्ष अघि आर्सनल आएका औबामेयाङले क्लबका लागि पहिलो ट्रफि जितेका त छन् तर अर्को सिजन च्याम्पियन्स लिग नै नहुने भएकाले उनी एमिरेट्स मै रहनेमा शंका भने रहेको छ ।
आर्सनलसँगको सम्झौता मात्र एक बर्ष बाकी रहेकाले औबामेयाङ यो समर अन्यका लागि अन्य क्लबहरुसँग नाम जोडिएको छ । “औबालाई अझै अनुभव र उपाधिहरु आवश्यक छ । हामी उनलाई यसमा बानी लगाउन सक्छौं,” औबामेयाङले ट्रफि उचाल्दा भुइमा झारेको तर्फ इंगित गर्दै आर्टेटाले ठट्टा गरे ।
“म उनको बारेमा के सोच्छु उनलाई राम्ररी थाहा छ । म उनको वरिपरि एउटा राम्रो टिम बनाउन चाहन्छु । उनी बस्न चाहन्छन् र हामीले सम्झौता निश्चित गरिदिने कुरामात्र बाकी रहेको छ । यस्तो क्षणहरुले हामी सहि बाटो जादैछौं भन्ने कुरालाई उनले बुझ्नेछन्,” व्यवस्थापक आर्टेटाले भने ।