स्टुवार्ट ब्रोडको घातक बलिङ तथा रोरी बर्न्सको उत्कृष्ट ब्याटिङको मद्दतमा पाहुना टोली वेस्ट इण्डिज बिरुद्धको तेश्रो तथा अन्तिम टेस्ट खेलमा इंग्ल्यान्ड जित नजिक पुगेको छ ।
तेश्रो दिनको खेलको समाप्तिमा तीन सय ९९ रनको लक्ष्य लिएर ब्याटिङमा आएको वेस्ट इण्डिजले दुई विकेटको नोक्सानीमा मात्र १० रन बनाउन सकेको छ भने जितका लागि दुई दिनमा अझै तीन सय ८९ रनको आवश्यकता रहेको छ । दोश्रो पारीमा पनि घातक बलिङ गर्दै ब्रोडले तीन ओभरमा आठ रन खर्चिएर दुई विकेट हात पारी सकेका छन् ।
खेलमा टस हारेर पहिले ब्याटिङ गरेको इंग्ल्यान्ड आफ्नो पहिलो पारीमा तीन सय ६९ रन बनायो भने जबाफी ब्याटिङ गरेको वेस्ट इण्डिजले मात्र एक सय ९७ रन बनाउन सक्यो । पहिलो परिमा एक सय ७२ रनको फराकिलो लिड लिएको इंग्ल्यान्डले आफ्नो दोश्रो पारीमा दुई विकेट गुमाएर दुई सय २६ रन बनाए पछि पारी सकिएको घोषणा गरेको हो ।
तेश्रो दिनको खेल छ विकेटको नोक्सानीमा एक सय ३७ रनको अवस्थाबाट सुरु गरेको वेस्ट इण्डिजले ६० रन जोड्दै आफ्ना सबै विकेट गुमाएको हो । वेस्ट इण्डिजका कप्तान जेसन होल्डर र विकेट किपर ब्याट्सम्यान शेन दाउरिच क्रमसः ४६ रन ३७ रन जोडे पनि आफ्नो टोलीलाई ठुलो योगफल सम्म पुर्याउन सकेनन् ।
वेस्ट इण्डिजको पारी धोस्त पार्ने क्रममा इंग्ल्यान्डका स्टुवार्ट ब्रोडले सर्वाधिक छ विकेट लिए भने जेम्स एन्डरसनले पनि दुई विकेट आफ्नो नाममा दर्ता गराए । ब्रोडले १४ ओभर बलिङ गर्दै मात्र ३१ रन खर्चिए ।
इंग्ल्यान्डको दोश्रो पारीमा ओपनर रोरी बर्न्सले सर्वाधिक ९० रन बनाए भने अर्का ओपनर डोम सिब्लीले पनि ५६ रनको पारी खेले । त्यस्तै कप्तान जो रुट ६८ रनमा अविजित रहे ।
यस अघि इंग्ल्यान्डको लागि पहिलो पारीमा ओल्ली पोपले सर्वाधि ९१ रन जोडे भने विकेट किपर ब्याट्सम्यान जस बटलरले पनि ६७ रनको पारी खेले । त्यस्तै रोरी बर्न्सले ५७ रन जोडे भने १० औं नम्बरमा ब्याटिंङ गर्न आएका बोर्डले तुफानी पारी खेल्दै ४५ बलमा ६२ रन जोड्दै इंग्ल्यान्डलाई राम्रो योगफल तर्फ लग्न सफल भए ।
पहिलो पारीमा वेस्ट इण्डिजका किमा रोचले सर्वाधिक चार विकेट लिए भने रोस्टन चेज र शन्नोन ग्याब्रियलले पनि समान २-२ विकेट हात पारे । तीन खेलको शृंखला १-१ को स्थितीमा रहेको छ ।
पहिलो टेस्टमा वेस्ट इण्डिजले चार विकेटको रोमान्चक जीत हात पारेको थियो भने दोश्रो टेस्टमा इंग्ल्यान्डले वेस्ट इण्डिजलाई ११३ रनको फराकिलो अन्तरले पराजित गरेको थियो ।
