पिएसजीको ९–० को जित दर्शकको प्रवेशले छायाँमा

फ्रेञ्च लिग च्याम्पियन पेरिस सेन्ट जर्माइनले आइतबार एक मैत्रीपूर्ण खेलमा दोश्रो श्रेणीको क्लब ले हाभ्रेलाई ९–० को फराकिलो अन्तरले पराजित गर्यो । तर चर्चा पिएसजीको फराकिलो जितको भएन । फुटबलको जित मानिएको खेलमा फ्रेञ्च फुटबलले कोरोना भाइरसपछि युरोपको पाँच प्रमुख फुटबलिङ्ग राष्ट्रमध्ये पहिलो पटक दर्शकलाई समावेश गराएको थियो । पिएसजीको रवाफिलो जितलाई दर्शकको प्रवेशले छायामा पार्न पुग्यो ।

गत सप्ताहन्त अघि फ्रेञ्च सरकारले स्वास्थ्य प्रोटोकोल केही खुकुलो पारेपछि दर्शक, खेलाडी, पत्रकार र स्टाफहरु गरेर कुल ५ हजार ले हाभ्रेको घरेलु मैदानमा भएको खेलमा उपस्थित रहेका थिए । ३० युरो र ६० युरो तोकिएको टिकटहरु ६ मिनेटमै बिक्रि भएको थियो ।

“यो फ्रेञ्च फुटबल र समग्रमा खेलकुदकै जित हो,” खेलकुद मन्त्री रोक्साना मारासिनिनुले भने । “बढी मान्छे स्टेडियममा हुने गरि फुटबल लोकप्रिय तरिकाले नै फ्रान्समा सुचारु भएकोमा म निकै खुशी छु । पश्चिम युरोपमा हामीले मात्र यो सम्भव हुन दिएको छौं ।”

फ्रान्सले फुटबल सिजनलाई नै रद्द गर्दा जर्मनी, इङ्गल्याण्ड, इटाली र स्पेनले भने लिगलाई सुचारु गरेका थिए । तर ती सबै देशहरुमा फुटबल खाली रँगशालामा सञ्चालन हुदै आएको छ । आइतबार सामाजिक दुरी कायम गरिनुपर्ने नियम लागेपनि २५ हजार दर्शक क्षमता रहेको रँगशालामा प्रवेश गरेपछि भने स्वतन्त्रता पुर्वक एकतृत भएका थिए ।

“केही शर्तहरु रहेपनि यो साधारण जीवनमा फर्किएको जस्तो महसुस भएको छ,” ले हाभ्रेको सबैभन्दा ठूलो समर्थक समुह ले बार्बरियन्स हाभ्रेका अध्यक्ष योहान भाट्टियरले भने । “हामीलाई पिएसजीको कुनै मतलब छैन, यो खेल हाम्रो लागि आफ्ना साथीहरुसँगै हुने पहिलो तरिका रहेको थियो । हाम्रो जस्तो समुहहरुले नियम लाद्न अलि गाह्रो हुन्छ किनभने हाम्रो एकै ठाँउमा झुम्मिएर बस्ने बानी छ । तर हामी सम्भव रहेसम्म नियमहरु मान्नको लागि तयार छौं,” उनले थपे ।

गोल गरेपछी खुशीयाली मनाउदै नेमार, इकार्डी र एमबाप्पे

२० बर्षिय पिएसजीका डाइ हार्ड फ्यान एलनले आफ्नो सपनाको टोलीलाई खेलेको प्रत्यक्ष हेर्न पाउदा सम्भावित स्वास्थ्य खतरातर्फ खासै ध्यान नगएको बताए । “जब मैले पेरिस हो भनेर थाहा पाए, मलाई अरु कतै तिर ध्यान नै गएन । टिभीमा खाली रँगशालाको फुटबल हेर्दा हेर्दा दिक्क लागिसकेको छ,” एलान भन्छन् ।

खेलमा भने नेमार र माउरो इकाडीले दुई–दुई र किलियन एमबाप्पेले एक गोल गरेपछि पिएसजीले पहिलो हाफमै पाँच गोल गरेको थियो । पिएसजी त्यसपछि १० खेलाडी परिवर्तन गरेको थियो । दोश्रो हाफमा पाब्लो साराबियाले दुई गोल गरे भने इद्रिसा गुयेये र आर्नौड कालिमुयेन्डोले १–१ गोल थपेका थिए ।

जुलाई अन्तिम र अगष्ट पहिलो हप्ताहरुमा व्यस्त रहेको पिएसजीले फ्रेञ्च कप फाइनलमा सेन्ट एटिनेको जुलाई २४ मा सामना गर्दैछ भने त्यसको एक सातापछि फ्रेञ्च लिग कप फाइनलमा लियोनसँग खेल्नेछ । यस्तै च्याम्पियन्स लिगमा पिएसजीले इटालियन टोली एट्लान्टाको सामना अगष्ट १२ मा गर्नेछ । दुवै फेञ्च फाइनल पेरिसको स्टाड डे फ्रान्समा हुनेछ ।

८० हजार सिट क्षमता रहेको रँगशालामा दर्शकको संख्या जुलाई १८ मा निर्धारण गरिने खेलकुद मन्त्रीले बताएका छन् । यसअघि फ्रेञ्च फुटबलले पाँच हजारलाई उक्त दुई फाइनल हेर्नका लागि प्रवेश दिइने बताएको थियो ।