१० औँ नम्बरमा ब्याटिङ गर्न आएका गाविन मेनले अविजित अर्धशतक प्रहार गर्दा विश्वकप लिग टु अन्तर्गतको त्रिकोणात्मक शृंखलामा घरेलु टोली स्कटल्याण्डले नेपाललाई १४५ रनको मध्यम लक्ष्य दिएको छ ।
खेलमा टस जितेर पहिले बलिङ गर्ने निर्णय लिएको नेपालले स्कटल्याण्डलाई ४२ दशमलब पाँच ओभरमा १४४ रनमा अल आउट गर्न सफल भयो ।
स्कटल्याण्डको पारी ध्वस्त पार्ने क्रममा आदिल अन्सारी र सोमपाल कामीले समान ३-३ विकेट हात पारे भने सन्दिप लामिछानेले दुई विकेट लिए । त्यस बाहेक करण केसी र दिपेन्द्र सिंह ऐरीले समान १-१ विकेट आफ्नो नाममा दर्ता गराए ।
एक समय एक सय रनको स्कोर पनि कटाउन नसक्ने अवस्थामा रहेको स्कटल्याण्डको लागि नवौँ नम्बरका गाविन मेनले ५९ बलमा सात चौका र एक छक्काको मद्दतमा अविजित ६४ रन प्रहार गरे । ९५ रनमा नौ विकेट गुमाएको स्कटल्याण्डको लागि मेन र हम्जा ताहिरले ५९ रनको साझेदारी गर्न सफल भए ।
मेन बाहेक स्कटल्याण्डको लागि मार्क वाटले १७, सफ़्यन शरिफले १६ तथा क्यालम म्याकलोयडले १३ रनको पारी खेल्दा अन्य ब्याटरले दोहोरो अंकमा रन निकाल्न सकेनन् ।
