अर्थहीन खेलमा हैदराबाद माथि पन्जाबको शानदार जित 

यस अघि नै प्लेअफको दौडबाट बाहिरी सकेका कारण अर्थहीन खेलमा पन्जाब किंग्सले सनराइजर्स हैदराबाद माथि पाँच विकेटको सहज जित हात पारेको छ । 

१५ औँ संस्करणको इन्डियन प्रिमियर लिग (आईपीएल) मा यस अघि नै चार टोलीहरु – गुजरात, राजस्थान, लखनउ र बेंगलोरले प्लेअफमा आफ्नो स्थान सुरक्षित गरिसकेकाले आजको हार जितले पन्जाब र हैदराबादलाई खासै ठुलो फरक परेन । आजको खेलमा जित निकाल्दा पन्जाब छैटौँ स्थानमा उक्लियो भने हैदराबाद आठौँ स्थानमा खस्कियो ।

टस जितेर पहिले ब्याटिङ गरेको हैदराबादले पुरै २० ओभर खेल्दै आठ विकेट गुमाएर १५७ रन मात्र जोड्न सक्यो भने पन्जाबले पाँच विकेट गुमाएर २९ बल अगावै जित सुनिश्चित गर्यो ।

हैदराबादलाई मध्यम स्कोरमा रोक्ने क्रममा खेलको प्लेयर अफ द म्याच घोषित हरप्रित ब्रारले चार ओभरमा २६ रन तथा न्याथन एलिसले चार ओभरमा ४० रन खर्चिएर समान ३-३ विकेट लिए भने कागिसो रबाडाले पनि एक विकेट आफ्नो नाममा दर्ता गराए ।

पन्जाबको जितमा ब्याटिङमा अविजित रहेका लियाम लिविंगस्टोनले आक्रामक पारी खेल्दै २२ बलमा दुई चौका र पाँच छक्काको मद्दतमा सर्वाधिक ४९ रन बनाए भने ओपनरद्वय शिखर धवन र जोनी बेयरस्टोले क्रमश ३९ र २३ रनको योगदान दिए ।

हैदराबादका ओपनर अभिषेक शर्माले सर्वाधिक ४३ रन जोड्दा रोमारियो शेफार्डले अविजित २६, वाशिंगटन सुन्दरले २५, ऐडेन मार्क्रमले २१ तथा राहुल त्रिपाठीले २० रनको योगदान दिए ।