आगामी महिना गर्ने भ्रमणका लागि नेपाली टोलीको नाम सार्वजनिक भएको छ । विश्वकप लिग टु अन्तर्गत आयोजना हुने नेपाल, अमेरिका र ओमान सम्मिलित टोलीमा तीब्र गतिका बलर किशोर महोतो, ओपनर ब्याटर सुनिल धमला र आक्रामक ब्याटर आदिल अन्सारीले पहिलो पटक एकदिवसीय राष्ट्रिय टोलीमा स्थान बनाउन सफल भएका छन् ।
सन् २०१७ मा घरेलु मैदानमा सम्पन्न वर्ल्ड क्रिकेट लिग च्याम्पियनसिप अन्तर्गत केन्या विरुद्धको दुबै खेलमा नेपालको लागि ओपनिङ गरेका धमलाले त्यस पछि भने नेपाली टोलीमा अवसर पाउन सकेका थिएनन् । पछिल्लो पटक गत महिना घरेलु मैदानमा नै सम्पन्न जिम्बाब्वे ए विरुद्धको खेलमा नेपाली जर्सीमा खेलेका धमलाले पहिलो पटक एकदिवसीय नेपाली टोलीमा स्थान बनाएका हुन् ।
त्यस्तै किशोरले पनि पहिलो पटक नेपाली टोलीको लागि स्थान सुरक्षित गर्न सफल भएका छन् । उनले पनि यस अघि जिम्बाब्वे ए विरुद्धमा नेपाली टोलीका लागि खेलेका थिए ।
यु१९ टोलीका कप्तान देव खनालले पनि अमेरिका भ्रमणका लागि टिकट काटेका छन् । उनले पपुवा न्यु गिनी विरुद्ध घरेलु मैदानमा भएको दुई खेलको शृंखला अन्तर्गत पहिलो खेलमा डक आउट भए पनि दोश्रो खेलमा अर्धशतकीय पारी खेलेका थिए । नेपाली टोलीमा मुख्य प्रशिक्षक पुबुदु दासानायेकेले उनलाई जिम्बाब्वे ए विरुद्धको खेलमा भने तीनवटै खेलमा खेलाएका थिएनन् ।
ट्वान्टी ट्वान्टीमा आफूलाई प्रमाणित गरिसकेका आक्रामक ब्याटर आदिल अन्सारीले पनि अमेरिका भ्रमणका लागि टोलीमा पर्न सफल भएका छन् । उनी पनि पहिलो पटक एकदिवसीय टोलीमा अटाएका हुन् ।
सन्दिप लामिछानेको कप्तानीमा रहेको नेपालले अमेरिका भ्रमणमा दुई अभ्यास खेल खेल्ने छ भने त्यस पछि जुन आठ तारिकबाट लिग टु का शृंखला खेल्ने छ ।
सन्दिप लामिछाने (कप्तान),आसिफ शेख, कुशल भुर्तेल, रोहित कुमार पौडेल, दिपेन्द्र सिंह ऐरी, आरिफ शेख, बिनोद भण्डारी, सुनिल धमला, देव खनाल, आदिल अन्सारी, करण केसी, बिक्रम सोब, किशोर महतो, सागर ढकाल