खराब फिल्डिङ कारण जित नजिक पुगेर पनि नेपालले युगान्डासँगको दोश्रो ट्वान्टी ट्वान्टी अन्तर्राष्ट्रिय खेलमा एक विकेटको हारको सामना गरेको छ । आजको खेलमा पराजित हुँदा नेपाल पाँच खेलको शृंखलामा २-० ले पछि परेको छ ।
नेपालले दिएको १०२ रनको लक्ष्य युगान्डाले एक बल बाँकी रहँदा नौ विकेट गुमाएर जित आत्मसाथ गर्यो ।
१९ औँ ओभरको अन्तिम दुई बल तथा २० औँ ओभरको सुरुवाती दुई बलमा विकेट निकाल्दै नेपाल जित नजिक पुगे पनि खराब फिल्डिङ गर्दा हार बेहोर्न बाध्य भएको हो ।
युगान्डाको जितमा रिटा मुसमालीले सर्वाधिक ३० रन बनाइन् भने फ्र्यांकलिन नाजुम्बाले १९ तथा जानेट एमबाबाजीले १६ रनको योगदान दिए ।
नेपालको तर्फबाट सबनम राई र कविता कुँवरले समान २-२ विकेट हात पारे भने कविता कुँवर, सिता राना मगर र कप्तान रुबिना क्षेत्रीले समान १-१ विकेट हात पारे । रुबिनाले चार ओभरमा १६ तथा कविताले तीन दशमलब पाँच ओभरमा १८ रन खर्चिए ।
नेपालले दोश्रो ट्वान्टी ट्वान्टी अन्तर्राष्ट्रिय खेलमा युगान्डालाई १०२ रनको चुनौतिपूर्ण लक्ष्य दिएको छ ।
खेलमा टस हारेर पहिले ब्याटिङ गरेको नेपालले पुरै २० ओभर खेल्दै सात विकेट गुमाएर १०१ रन बनायो ।
नेपालको तर्फबाट ओपनर बिन्दु रावलले ३६ बल खेल्दै सर्वाधिक २६ रन बनाइन् भने चौथो नम्बरमा ब्याटिङ गर्दै सरिता मगरले २७ बलमा २२ रनको योगदान दिइन् ।
ओपर इन्दु वर्मा पाँच तथा अप्सरी बेगम ६ रनमा आउट हुँदा खराब सुरुवात गरेको नेपालको लागि सरिता र बिन्दुले पारी सम्हालेका थिए । नेपालका अन्य ब्याटरमा सिता राना मगर ६, कविता जोशी डक आउट भए ।
त्यस बाहेक कप्तान रुबिना क्षेत्री अन्तिम बलमा रन आउट हुनु अघि १५ बलमा १७ तथा डली भट्टले सात बल खेल्दै एक छक्काको मद्धतमा अविजित नौ रनको पारी खेलिन् ।
युगान्डाकी जानेट एम्बाबाजीले सर्वाधिक दुई विकेट हात पारिन् ।