ओपनर डेविड वार्नरले अविजित अर्धशतक तथा मिचेलमार्शले अलराउण्ड प्रदर्शन गर्दा दिल्ली क्यापिटल्सले राजस्थान रोयल्स माथि आठ विकेटको शानदार जित निकालेको छ ।
जितसँगै दिल्लीले १५ औँ संस्करणको इन्डियन प्रिमियर लिग (आईपीएल) को प्लेअफमा पुग्ने आशा जीवितै राख्न सफल भएको छ । १२ खेलमा समान ६-६ जित र हार दर्ता गराएको दिल्ली १२ अंकका साथ अंक तालिकाको पाँचौँ स्थानमा उक्लिएको छ । १२ खेल नै खेलेको राजस्थान भने १४ अंकका साथ तेश्रो स्थानमा यथावत रहेको छ ।
मिचेलमार्श र डेविड वार्नरले अर्धशतकीय पारी खेल्दा राजस्थानले दिएको १६१ रनको मध्यम लक्ष्य दिल्लीले १८ दशमलब एक ओभर खेल्दै दुई विकेट गुमाएर लक्ष्य पार गर्यो ।
श्रीकर भरत शून्य रनमा आउट भए पनि वार्नर र मार्शले दोश्रो विकेटका लागि १४४ रनको साझेदारी गर्दै दिल्लीको जितको आधार बनाए । बलिङमा दुई महत्वपूर्ण विकेट हात पारेका मार्शले सर्वाधिक ८९ रनको पारी खेले । खेलको प्लेयर अफ द म्याच घोषित उनले ६२ बलमा पाँच चौका र सात छक्का प्रहार गरे । अविजित रहेका वार्नरले ४१ बलमा ५२ रनको पारी खेले भने कप्तान ऋषभ पन्तले पनि अविजित रहँदै १३ रनको योगदान दिए ।
राजस्थानका ट्रेन्ट बोल्ट र युजवेन्द्र चाहलले समान १-१ विकेट हात पारे ।
यस अघि खेलमा टस हारेर पहिले ब्याटिङ गरेको राजस्थानले २० ओभरमा ६ विकेट गुमाएर १६० रन बनायो ।
ओपनरद्वय जस बटलर र यशस्वी जैसवाल क्रमश सात र १९ रनमा आउट हुँदा खराब सुरुवात गरेको राजस्थानको लागि रविचन्द्रन अश्विन र देवदत्त पडिक्कलले पारी सम्हाले । ३८ बलमा सर्वाधिक ५० रन जोडेका अश्विन र ३० बलमा योगदान दिएका पडिक्कलले तेश्रो विकेटका लागि ६ ओभरमा ५३ रनको साझेदारी गरे ।
त्यस पछि आएका कप्तान सन्जु सामसन ६, रियान पराग नौ रनमा पेभेलियन फर्किए भने अविजित रहेका रस्सी भान डर डुस्सेन र ट्रेन्ट बोल्टले क्रमश १२ र तीन रन मात्र जोड्न सके ।
दिल्लीका चेतन सकारिया,मिचेलमार्श र एनरिचनोर्किएले समान २-२ विकेट हात पारे ।