ओपनर डेविड वार्नरले आफ्नो पूर्व टोली सनराइजर्स हैदराबाद विरुद्ध आक्रामक पारी खेल्दा दिल्ली क्यापिटल्सले २१ रनको फराकिलो जित निकालेको छ ।
जितसँगै दिल्ली इन्डियन प्रिमियर लिग (आईपीएल) को जारी सिजन अंक तालिकाको पाँचौँ स्थानमा उक्लिएको छ भने हैदराबाद छैटौँ स्थानमा खुम्चिएको मात्र नभएर तेश्रो स्थानमा उक्लने अवसर पनि गुमायो । समान १०-१० खेल खेलेका दिल्ली र हैदराबादको समान १०-१०अंक रहे पनि नेट रन रेटका आधारमा दिल्ली माथि रहेको हो ।
दिल्लीको जितमा खेलको प्लेयर अफ द म्याच घोषित वार्नरले ५८ बल खेल्दै १२ चौका र तीन छक्काको मद्दतमा अविजित रहँदै सर्वाधिक ९२ रन बनाए । वार्नर बाहेक पाँचौँ नम्बरमा ब्याटिङ गर्न आएका रोवमन पावेलले ३५ बल खेल्दै तीन चौका र ६ छक्का सहित अविजित ६७ रनको जोड्दा खेलमा टस हारेर पहिले ब्याटिङ गरेको दिल्लीले पुरै २० ओभर खेल्दै तीन विकेट गुमाएर २०७ रनको विशाल योगफल बनायो ।
वार्नर र पावेलले चौथो विकेटका लागि ६६ बलमा अविजित १२२ रन जोड्दा दिल्लीले विशाल योगफल बनाउन सफल भएको हो । उनीहरु बाहेक दिल्लीको तर्फबाट ओपनर मन्दिप सिंह पाँच बल खेल्दै डक आउट भए भने मिचेलमार्शले १० तथा कप्तान ऋषभ पन्तले २६ रन भन्दा जोड्न सकेनन् ।
विकेट किपर निकोलस पुरनले ३४ बल खेल्दै दुई चौका र ६ छक्का सहित सर्वाधिक ६२ तथा ऐडेनमार्क्रमले २५ बलमा चार चौका र तीन छक्का सहित ४२ रनको आक्रामक पारी खेले पनि हैदराबादले पुरै २० ओभर खेल्दै आठ विकेट गुमाएर १८६ रन भन्दा जोड्न सकेन ।
ओपनर तथा कप्तान केन विलियमसन चार, अर्का ओपनर अभिषेक शर्मा सात, राहुल त्रिपाठी २२, शशांक सिंह १०, सिनएबट सात रनमा आउट हुँदा हैदराबादले अंक तालिकाको तेश्रो स्थानमा उक्लने अवसर गुमायो ।
हैदराबादलाई रोक्ने क्रममा खलिल अहमदले सर्वाधिक तीन विकेट लिए भने शार्दुल ठाकुरले दुई विकेट आफ्नो नाममा दर्ता गराए ।