इन्डियन प्रिमियर लिग (आईपीएल) को सुरुवातमा कप्तान छाडेका महेन्द्र सिंह धोनीले फेरी कप्तानी सम्हालेको खेलमा चेन्नाई सुपर किंग्सले सनराइजर्स हैदराबाद माथि १३ रनको सहज जित निकालेको छ ।
सुरुवाती सिजन देखि नै कप्तानी सम्हालेका धोनीले यसै सिजनको सुरुवातमा कप्तानी छाड्दा चेन्नाईलेरविद्न जडेजालाई कप्तान नियुक्त गरेको थियो । तर सुरुवाती आठ खेलमा चेन्नाईले खराब प्रदर्शन गर्दा जडेजाले कप्तानीबाट राजिनामा दिएका थिए भने धोनीलाई पुन कप्तानीको जिम्मा दिइएको हो ।
जारी सिजन नवौँ खेलमा चेन्नाईको यो तेश्रो जित हो । यस अघि आठ खेलमा दुई जित मात्र निकाल्न सकेको चेन्नाई ६ अंकका साथ अंक तालिकाको नवौँ स्थानमा यथावत रहेको छ । आजको खेलमा जितबाट बञ्चित बनेको हैदराबादले अंक तालिकाको तेश्रो स्थानमा उक्लने अवसर गुमाएको छ ।
चेन्नाईले दिएको २०३ रनको विशाल लक्ष्य सहित ब्याटिङमा आएको हैदराबादले पुरै २० ओभर खेल्दा ६ विकेट गुमाएर १८९ रन मात्र जोड्न सक्यो ।
हैदराबादको तर्फबाट पाँचौँ नम्बरमा ब्याटिङ गर्न आएका निकोलस पुरनले ३३ बल खेल्दै तीन चौका र ६ छक्काको मद्दतमा अविजित ६४ रन बनाए भने कप्तान केन विलियमसनले ४७ तथा अभिषेक शर्माले ३९ रनको योगदान दिए भने अन्य ब्याटरले उल्लेख्य योगदान दिन सकेनन् ।
कप्तान विलियमसन र अभिषेकले पहिलो विकेटका लागि पाँच दशमलब पाँच ओभरमा ५८ रन जोड्दै हैदराबादलाई राम्रो सुरुवात दिलाए । राहुल त्रिपाठी गोल्डेन डक-आउट,ऐडेनमार्क्रम १७, शशांक सिंह १५ तथा वाशिंगटन सुन्दर दुई रनमा आउट हुँदा हैदराबादले दुई अंक जोड्ने अवसर गुमायो ।
अन्तिम १२ बलमा निकोलस पुरनले १२ बलमा ३६ रन जोड्दै हैदराबादलाई जित नजिक पुर्याए पनि जित भने दिलाउन सकेनन् ।
चेन्नाईका मुकेश चौधरीले सर्वाधिक चार विकेट हात पारे ।
यस अघि खेलमा टस हारेर पहिले ब्याटिङ गरेको चेन्नाईले २० ओभरमा दुई विकेट गुमाएर २०२ रनको विशाल योगफल बनायो ।
चेन्नाईको लागि शतक बनाउनबाट एक रनले चुकेका ओपनर रुतुराजगायकवाडले सर्वाधिक ९९ रन बनाए भने अर्का ओपनर डेवनकन्वेले अविजित रहँदै ८५ रनको पारी खेले । ५७ बलमा समान ६-६ चौका प्रहार गरेका गायकवाड र ५५ बलमा आठ चौका र चार छक्का प्रहार गरेका कन्वेले पहिलो विकेटका लागि १७ दशमलब पाँच ओभरमा १८२ रनको साझेदारी गर्दै चेन्नाईलाई उत्कृष्ट सुरुवात दिए ।
गायकवाडको पतन पछि क्रिजमा आएका कप्तान महेन्द्र सिंह धोनीले आठ रन भन्दा जोड्न सकेनन् भने पुर्व कप्तान रविन्द्र जडेजाले अविजित एक रन मात्र बनाए ।
हैदराबादका टि नटराजनले दुई विकेट लिए भने अन्य बलर विकेट बिहिन रहन पुगे ।