“आईपीएलबाट आफ्नो नाम फिर्ता लिउ”

भारतीय क्रिकेट टोली तथा इन्डियन प्रिमियर लिग (आईपीएल) फ्रेन्चाइज रोयल च्यालेन्जर्स बेंगलोरका पूर्व कप्तान विराट कोहली आफ्नो खेल जीवनको सायद सबैभन्दा खराब फर्मबाट गुज्रिरहेका छन् ।

जारी सिजन नौ खेल खेल्दा कोहलीले १६ को औसतमा मात्र १२८ रन जोड्न सफल भएका छन् । उनले यस सिजन चार खेलमा दोहोरो अंकमा रन जोड्दा बाँकी पाँच खेलमा एक अंकको मात्र स्कोर बनाउन सके । त्यस्तै उनी लखनउ र हैदराबादसँगको लगातार दुई खेलमा गोल्डेन डकआउट भए ।

धेरै क्रिकेट पण्डितहरूले कोहलीको खराब फर्म केही समय मात्र चल्ने र उनी अझै सशक्त ब्याटर बनेर फर्कने विश्वास गर्दा भारतीय क्रिकेट टोलीका पूर्व प्रशिक्षक रवि शास्त्री भने कोहलीले आईपीएलबाट विश्राम लिन पर्ने धारणा व्यक्त गरेका छन् ।         

शास्त्रीले कोहलीलाई आफ्नो खराब फर्मबाट मुक्ति पाउनका लागि जारी सिजनबाट आफ्नो नाम फिर्ता लिन सुझाएका हुन् । 

“मेरो विचारमा कोहलीले केही समय क्रिकेटबाट विश्राम लिन पर्दछ । उनले भारतको लागि टेस्ट, एकदिवसीय र ट्वान्टी ट्वान्टीमा साथै आईपीएलबाट पनि लामो समय खेलेका छन् । जीवनमा कुनै समय यस्तो अवस्था आउँछ जहाँ तपाईंले सबै कुराको सन्तुलन मिलाउन पर्ने हुन्छ,” शास्त्रीले भने । “कोहलीले यदि आफ्नो खेल जीवनको ख्याल राख्छन् भने उनले जारी सिजन आईपीएलबाट आफ्नो नाम फिर्ता लिन पर्दछ ।”   

शास्त्रीले चर्चित र धनी क्रिकेट प्रतियोगिता सबै खेलाडीले खेल्नै पर्छ भन्ने नरहेको र आफ्नो मानसिक स्वास्थ्यका लागि क्रिकेटबाट विश्राम लिन पर्ने पनि बताए । क्रिकेट कमेन्टेटर समेत रहेका उनले कोहलीलाई पैसा नहेर्न र बाँकी सिजनबाट आफ्नो नाम फिर्ता लिन पनि सुझाए ।

“कोहलीले बेंगलोर फ्रेन्चाइजलाई गएर आधा सिजनको पैसा दिन भन र बाँकी रहेको खेलहरु खेल्न नसक्ने भन्न पर्दछ । कोहलीसँग अझै धेरै क्रिकेट बाँकी रहेको छ । कहिले काहीँ कठिन र क्रूर निर्णय पनि लिन पर्दछ । अहिले कठिन लागे पनि कोहलीले भविष्यमा पहिलेको जस्तै प्रदर्शन जारी राख्न केही समय खेलबाट टाढा रहने निर्णय लिनै पर्दछ ।”