च्याम्पियन्स लिगको निकै नै सनसनीपूर्ण सेमिफाइनलमा रियल म्याड्रिडलाई पराजित गर्दै म्यानचेस्टर सिटीले पहिलो लेगमा एक गोलको झिनो अग्रता लिएको छ ।
एतिहाद स्टेटियममा भएको खेलमा सिटीले रियललाई ४–३ ले पराजित गर्यो । खेल शुरु भएको दोश्रो मिनेटमै सिटीले अग्रता लिएको थियो । रियाद माह्रेजको असिस्टमा केभिन डि ब्रुनले पहिलो गोल गरेका थिए ।
९ मिनेटपछि यसअघि प्रिमियर लिगमा वाटफोर्डबिरुद्ध एकै खेलमा चार गोल गरेका ग्याब्रियल जिजसले डि ब्रुनको पासमा गोल गर्दै अग्रतालाई दोब्बर बनाए । यो सिजन आफ्नो करिअरकै उच्च लयमा देखिएका करिम बेन्जेमाले रियललाई खेलमा फर्काए ।
बेन्जेमाले ३३ औं मिनेटमा फर्नाण्ड मेन्डीको पासमा गोल गरे । दोश्रो हाफ शुरु भएको ८ मिनेटपछि नै सिटीले दोब्बर अग्रतालाई कायम राख्न सफल भयो । यसपटक फिल फोडेनले फर्नान्डिनोको क्रसमा गोल गरेका थिए ।
तर दुई मिनेट भित्रै रियल खेलमा फर्कियो । भिनिसियस जुनियरले फर्लाण्ड मेन्डीको असिस्टमा रियलका लागि दोश्रो गोल गरे । दुवैतर्फ बाट आक्रमणले भरिपूर्ण खेलमा सिटीले चौथो गोल पनि फर्कायो । ७४ औं मिनेटमा बर्नार्डो सिल्भाले ओलेक्जेण्डर जिनचेन्कोको पासमा गोल गरे ।
तर बेन्जेमाले ८२ औं मिनेटमा प्राप्त पेनाल्टीलाई गोलमा परिणत गर्दै रियललाई दोश्रो लेगका लागि फाइनल यात्रामा कायमै राख्न सफल भए । बेन्जेमाको च्याम्पियन्स लिगमा यो सिजन १४ गोल भइसकेको छ ।
बायर्न म्युनिखका पोलिस स्ट्राइकर रोबर्ट लेवान्डोस्कीलाई उनले यो सिजन एक गोलले पछि पारिसकेका छन् । बेन्जेमाले एकै सिजन सबैभन्दा बढी च्याम्पियन्स लिग गोल गर्ने आफ्नो नयाँ किर्तिमान यसअघि नै तोडिसकेका थिए । यसअघि उनले एकै सिजन सबैभन्दा बढी ७ गोल गरेका थिए ।
