लखनउ सुपर जायन्ट्का कप्तान केएल राहुलले जारी इन्डियन प्रिमियर लिग (आईपीएल) मा दोश्रो शतक प्रहार गर्दा पाँच पटकको च्याम्पियन मुम्बई इन्डियन्सले लगातार आठौँ खेलमा हारको सामना गरेको छ । आठ खेल खेल्दा आठवटामा नै पराजय भोगेको मुम्बई लखनउसँग ३६ रनले पराजित हुन पुग्यो ।
आजको खेलमा जित निकाल्दै लखनउ आठ खेलमा पाँच जित र तीन हार सहित १० अंकका साथ अंक तालिकाको चौथो स्थानमा उक्लिन सफल भएको छ । गुजरात १२ अंक सहित पहिलो स्थानमा छ भने एक एक खेल कम खेलेका हैदराबाद र राजस्थान समान १० अंक नै रहे पनि नेट रन रेटका आधारमा क्रमश दोश्रो र तेश्रो स्थानमा रहेका छन् । अंक जोड्न नसकेको मुम्बई अंक तालिकाको पुछारमा रहेको छ ।
फेरी पनि ब्याटरहरु चल्न नसक्दा १६९ रनको मध्यम लक्ष्य पछ्याएको मुम्बईले पुरै २० ओभर खेल्दै आठ विकेट गुमाएर १३२ रन मात्र जोड्न सक्यो ।
मुम्बईका कप्तान रोहित शर्माले ३९, तिलक वर्माले ३८ तथा कायरन पोलार्डले १९ रन बाहेक अन्य कुनै पनि ब्याटरले दोहोरो अंकमा रन जोड्न सकेनन् । यस सिजन सबैभन्दा महँगो रकममा बिकेका ओपनर तथा विकेट किपर इशान किशानले २० बल खेल्दै आठ रन जोडे भने बेबी एबीका नामले परिचित डेवाल्ड ब्रेविसले तीन रन मात्र जोड्दै पेभेलियन फर्किए ।
लखनउको तर्फबाट कुर्नाल पान्ड्याले चार ओभरमा १९ रन खर्चिएर सर्वाधिक तीन विकेट लिए भने मोहसिन खान, जेसन होल्डर, रवि बिश्नोई र आयुष बदोनीले पनि समान १-१ विकेट आफ्नो नाममा दर्ता गराए । निकै किफायती बलिङ गरेका दुश्मन्था चमिराले विकेट निकाल्न नसके पनि चार ओभरमा १४ रन मात्र खर्चिए ।
यस अघि कप्तान केएल राहुलको शतकको मद्दतमा खेलमा टस हारेर पहिले ब्याटिङ गरेको लखनउले पुरै २० ओभर खेल्दै ६ विकेट गुमाएर १६८ रनको मध्यम योगफल खडा गर्यो ।
लखनउको लागि खेलको प्लेयर अफ द म्याच घोषित राहुलले ६२ बल खेल्दै १२ चौका र चार छक्काको मद्दतमा अविजित १०३ रनको पारी खेले । जारी सिजन राहुलको मुम्बई विरुद्ध दोश्रो तथा समग्रमा तेश्रो शतक हो । उनले यस अघि पहिलो लेगमा पनि मुम्बई विरुद्ध अविजित रहँदै १०३ रनको पारी नै खेलेका थिए ।
राहुल बाहेक लखनउको लागि मनिष पाण्डेले २२, आयुष बदोनिले ४ तथा दिपक हूडा र क्विन्टन डि ककले समान १०-१० रनको योगदान दिए ।
कायरन पोलार्डले दुई ओभरमा आठ रन तथा रायली मेरेडिथले ४० रन खर्चिएर समान २-२ विकेट लिए भने ड्यानियल साम्स र जस्प्रित बुम्राले पनि समान १-१ विकेट आफ्नो नाममा दर्ता गराए ।