डेविड वार्नरले तुफानी पारी खेल्दै अर्धशतक प्रहार गरे पछि दिल्ली क्यापिटल्सले इन्डियन प्रिमियर लिग (आईपीएल) को ३२ औँ खेलमा पन्जाब किंग्स माथि नौ विकेटको सहज जित हात पारेको छ ।
आजको खेलमा फराकिलो जित निकाल्दा दिल्ली अंक तालिकाको छैटौँ स्थानमा उक्लिएको छ भने पन्जाब आठौँ स्थानमा झरेको छ । ६ खेल खेलेको दिल्लीको यो तेश्रो जित हो भने सात खेल खेलेको पन्जाबको यो चौथो हार हो ।
टस जितेर पन्जाबलाई ब्याटिङ गर्न लगाएको दिल्लीले उसलाई २० ओभरमा ११५ मा अलआउट गरायो भने १० दशमलब तीन ओभर खेल्दै एक विकेटको क्षतिमा लक्ष्य पार गर्यो ।
दिल्लीको जितमा ओपनर डेविड वार्नरले अविजित रहँदै सर्वाधिक ६० रनको पारी खेले । ३० बलको सामना गरेका उनले १० चौका र एक छक्का प्रहार गरे । त्यस्तै अर्का ओपनर पृथ्वी शले पनि २० बलमा सात चौका र एक छक्काको मद्दतमा ४१ रन बनाए भने सर्फराज खानले पनि अविजित १२ रनको योगदान दिए ।
यस अघि पन्जाबलाई सस्तोमा रोक्ने क्रममा खलिल अहमद, ललित यादव, अक्सर पटेल र कुलदिप यादवले समान २-२ विकेट हात पारे । समान ४-४ ओभर बलिङ गरेका अक्सर, खलिल र कुलदिपले क्रमश १०, २१ र २४ रन खर्चिए भने ललितले दुई ओभरमा ११ रन मात्र दिए ।
पन्जाबका विकेट किपर जितेश शर्माले सर्वाधिक ३२ रन बनाउँदा ओपनर तथा कप्तान मायँकअगरवालले २४ तथा शाहरुख खान र राहुल चाहरले समान १२-१२ रनको योगदान दिए भने अन्य ब्याटरले दोहोरो अंकमा रन जोड्न सकेनन् ।