१४ वर्ष पछि अफगानिस्तानसँग मैत्रीपूर्ण खेल खेल्दै नेपाल

सन् २०२३ मा आयोजना हुने एसियन कप छनोटको तयारीमा रहेको नेपाली राष्ट्रिय फुटबल टोलीले अफगानिस्तानको राष्ट्रिय टोलीसँग दुई मैत्रीपूर्ण खेल खेल्ने भएको छ । नेपालले १४ वर्ष पछि अफगानिस्तानसँग मैत्रीपूर्ण खेल खेल्न लागेको हो । 

अखिल नेपाल फुटबल संघ (एन्फा) ले जनाए अनुसार नेपालले अफगानिस्तानसँग मे २५ र २९ तारिकमा कतारमा दुई मैत्रीपूर्ण खेलहरु खेल्ने छ । नेपालले अफगानिस्तानसँग उक्त मैत्रीपूर्ण खेलका लागि अनुरोध गरेको र अफगानिस्तान फुटबल संघले आज मात्र नेपालको प्रस्ताव स्वीकार गरेको एन्फाले जनाएको छ ।     

नेपालले पछिल्लो पटक सन् २००८ मा अफगानिस्तानसँग मैत्रिपूर्ण खेल खेलेको थियो । मलेसियामा भएको उक्त खेल २-२ को बराबरीमा सकिएको थियो । त्यस्तै नेपालले अफगानिस्तानसँग नौ वर्ष पछि पहिलो पटक खेल्न लागेको हो । नेपालले पछिल्लो पटक अफगानिस्तानसँग साफ च्याम्पियनसिपमा भिडेको थियो । सन् २०१३ मा घरेलु मैदानमा भएको साफ च्याम्पियनसिपको सेमिफाइनलमा नेपाल अफगानिस्तानले १-० गोल अन्तरले स्तब्ध हुँदा नेपालको पहिलो पटक फाइनल पुग्ने सपना चकनाचुर भएको थियो ।    

हाल एसियन कप छनोटको लागि बन्द प्रशिक्षणमा रहेको नेपाली टोली थप अभ्यासका लागि कतारको भ्रमण गर्नेछ । कतारमा अभ्यास र मैत्रीपूर्ण खेल पछि नेपाली टोली एसियन कप छनोटको लागि कुवेत तर्फ उड्ने छ ।

नेपालले एसियन कप छनोटमा आयोजक राष्ट्र कुवेतसँगै जोर्डन र इन्डोनेसिया । नेपालले छनोटको आफ्नो पहिलो खेल जुन आठ तारिकमा जोर्डनसँग खेल्ने छ भने ११ तारिकमा आयोजक कुवेतको सामना गर्नेछ । त्यस्तै नेपालले छनोट चरणको आफ्नो तेश्रो र अन्तिम खेलमा जुन १४ मा इन्डोनेसियासँग भिड्ने छ ।