उत्तर प्रदेश ११ सँग सात विकेटले पराजित हुँदा नेपाल एपीएफ क्लब एक खेल अगावै नेपाल प्रो क्लब च्याम्पियनसिपको समुह चरणबाट नै बाहिरिएको छ ।
आफूले खेलेका दुबै खेलमा पराजित हुँदा समुह बि बाट एपीएफको सेमिफाइनल खेल्ने आशा समाप्त भएको छ । आजको खेलमा एपीएफ माथि सहज जित निकाल्दा उत्तर प्रदेशले सेमिफाइनलमा आफ्नो स्थान सुरक्षित गरेको छ । यसै समुहबाट नेपाल आर्मी क्लबले पनि सेमिफाइनलको टिकट काटी सकेको छ । आर्मी र उत्तर प्रदेशले आफूले खेलेका दुबै खेलमा जित निकालेका थिए भने एपीएफ र ट्यालेन्ट हन्ट क्रिकेट एकेडेमी दुबै खेलमा पराजित हुन पुगे ।
प्रिन्स शाही र विपिन चन्द्रा बलमा चम्किँदा एपीएफले १७ दशमलब एक ओभरमा ७६ रन जोड्दा आफ्ना सबै विकेट गुमाउन पुग्यो भने उत्तर प्रदेशले १३ दशमलब दुई ओभरमा तीन विकेट गुमाएर लक्ष्य पार गर्यो ।
प्रिन्सले चार ओभर बलिङ गर्दै ११ रन दिएर सर्वाधिक चार विकेट लिए भने विपिनले तीन दशमलब एक ओभरमा सात रन दिएर दुई विकेट आफ्नो नाममा दर्ता गराए । त्यस बाहेक एपीएफलाई सस्तोमा रोक्ने क्रममा सन्दिप मित्तल, दिव्य सिंह र नितिन रामले पनि समान १-१ विकेट हात पारे ।
एपीएफका अमर सिंह राउटेलाले सर्वाधिक २१ रन जोडे भने सुमित महर्जनले १६ तथा पुरन बिकेले १२ रनको पारी खेल्दा अन्य ब्याटरले दोहोरो अंकमा रन जोड्न सकेनन् ।
उत्तर प्रदेशको जितमा राज यादवले अविजित २९ रन जोड्दा विवेक सिंहले २२ तथा राहुल कुमारले १६ रनको योगदान दिए ।