फेरी पनि हार्यो डिफेन्डिङ च्याम्पियन चेन्नाई 

लियाम लिविङ्गस्टोनले आक्रामक अर्धशतक बनाउनुका साथै महत्वपूर्ण दुई विकेट हात पार्दा १५ औँ संस्करणको इन्डियन प्रिमियर लिगमा चेन्नाई सुपर किंग्स फेरी पनि पराजित भएको छ । यस सिजनको ११ औँ खेलमा डिफेन्डिङ च्याम्पियन चेन्नाई पन्जाब किंग्ससँग ५४ रनको फराकिलो अन्तरले हार्न पुग्यो ।

तीन खेल खेलको चेन्नाईको यो लगातार तेश्रो हार हो । जारी सिजनको उद्घाटन खेलमा कोलकाता नाइटराइडर्ससँग ६ विकेटले हार्दै खराब सुरुवात गरेको चेन्नाई दोश्रो खेलमा नव प्रवेशी लखनउ सुपर जायन्ट्ससँग पनि ६ विकेटले नै पराजित भएको थियो । पन्जाबको भने तेश्रो खेलमा यो दोश्रो जित हो ।

खराब सुरुवात गरे पनि मध्यक्रमका ब्याटर लियाम लिविङ्गस्टोनले अर्धशतकीय पारी खेल्दा खेलमा टस हारेर पहिले ब्याटिङ गरेको पन्जाबले २० ओभरमा आठ विकेट गुमाएर १८० रनको चुनौतिपूर्ण योगफल बनायो । जबाफी ब्याटिङ गरेको चेन्नाईले १८ ओभरमा आफ्ना सबै विकेट गुमाएर १२६ रन भन्दा जोड्न सकेन । 

चेन्नाईको लागि छैटौँ नम्बरमा ब्याटिङ गर्न आएका शिवम दुबेले आक्रामक पारी खेल्दै ३० बलमा ६ चौका र तीन छक्काको मद्दतमा सर्वाधिक ५७ रन बनाए पनि अन्य ब्याटरबाट साथ नपाउँदा जित भने दिलाउन सकेनन् । 

दुबे बाहेक चेन्नाईका पुर्व कप्तान तथा विकेट किपर महेन्द्र सिंह धोनीले २३ तथा ओपनर रोबिन उथप्पा र अम्बाती रायुडूले समान १३-१३ रनको पारी खेल्दा अन्य ब्याटरले दोहोरो अंकमा रन जोड्न सकेनन् । चेन्नाईका मोईन अली, कप्तान रविन्द्र जडेजा र ड्वेन ब्राभो रनको खाता पनि नखोली पेभेलियन फर्कँदा चेन्नाईको पहिलो अंक जोड्ने आशा निराशामा परिणत भयो ।     

पन्जाबको जितमा राहुल चाहर चार ओभरमा २५ रन खर्चिएर सर्वाधिक तीन विकेट लिए भने चार ओभरमा २१ रन तथा तीन ओभरमा २५ रन दिएर वैभव अरोरा र लियाम लिविङ्गस्टोन समान २-२ विकेट आफ्नो नाममा दर्ता गराए ।  

कप्तान तथा ओपनर मायंक अगरवाललाई चार तथा तेश्रो नम्बरमा ब्याटिङ गर्न आएका भानुका राजापाक्षे नौ रनमा आउट भए पनि अर्का ओपनर शिखर धवन र लिविङ्गस्टोनले तेश्रो विकेटका लागि ९५ रन जोड्दै पन्जाबलाई राम्रो योगफल तर्फ डोर्याए । 

२४ रन जोडेका धवन र आक्रामक पारी खेल्दै ३२ बलमा समान ५-५ चौका र छक्का सहित सर्वाधिक ६० रन जोडेका लिविङ्गस्टोन ६ रनको अन्तरालमा आउट हुँदा पन्जाबले १० दशमलब चार ओभरमा ११५ रन जोडेको थियो ।

त्यस बाहेक तल्लो क्रमका ब्याटरहरुले ठुलो स्कोर बनाउन नसक्दा पन्जाब विशाल योगफल बनाउनबाट भने चुक्यो । उसका लागि विकेट किपर जितेश शर्माले २६ तथा अविजित कागिसो रबाडा र राहुल चाहरले समान १२-१२ जोडे ।

चेन्नाईका क्रिस जोर्डन र ड्वेन प्रिटोरियसले समान २-२ विकेट हात पारे ।