मध्यक्रमका ब्याटर दिपेन्द्र सिंह ऐरीले किर्तिमानी शतक प्रहार गर्नुको साथै दुई विकेट हात पार्दा घरेलु टोली नेपालले त्रिकोणात्मक शृंखलामा अपराजित रहँदै फाइनलमा पुगेको छ । शृंखला अन्तर्गत समुह चरणको अन्तिम खेलमा नेपालले मलेसियालाई ८५ रनको फराकिलो अन्तरले पराजित गर्यो ।
नेपालसँग मलेसिया हार्दा पपुवा न्यु गिनीको भने भाग्य चम्किएको छ । आजको खेलमा पराजित हुँदा मलेसियाको फाइनल खेल्ने सपना चकनाचुर भएको छ भने पिएनजीले फाइनलमा स्थान सुरक्षित गरेको छ । नेपालले चार मध्य चार खेलमा नै जित हात पार्दा पिएनजी र मलेसियाले समान १-१ खेलमा जित निकाल्न सके पनि पिएनजी नेट रन रेटका आधारमा फाइनलमा पुगेको हो ।
नेपालले दिएको २२४ रनको विशाल लक्ष्य पक्ष्याएको मलेसियाले १९ दशमलब पाँच ओभरमा आफ्ना सबै विकेट गुमाएर १३८ रन मात्र बनाउन सक्यो ।
मलेसियालाई सस्तोमा रोक्ने क्रममा कप्तान सन्दिप लामिछानेले चार ओभरमा १९ रन दिएर सर्वाधिक तीन विकेट लिए भने कमल सिंह ऐरी र दिपेन्द्रले समान २-२ विकेट हात पारे । त्यस बाहेक कुशल भुर्तेल र रोहित कुमार पौडेलले पनि समान १-१ विकेट आफ्नो नाममा दर्ता गराए ।
यस अघि खेलमा टस हारेर पहिले ब्याटिङ गरेको नेपालले २० ओभरमा पाँच विकेट गुमाएर २२३ रन बनायो । यो नेपालको ट्वान्टी ट्वान्टी अन्तर्राष्ट्रिय खेलमा तेश्रो ठुलो योगफल हो ।
नेपालको तर्फबाट चौथो नम्बरमा ब्याटिङ गर्न आएका दिपेन्द्रले अविजित रहँदै ५७ बलमा १० चौका र ६ छक्काको मद्दतमा सर्वाधिक ११० रन बनाए । दिपेन्द्रको यो नेपालको तर्फबाट सर्वाधिक स्कोर हो । यस अघि नेपालको तर्फबाट पूर्व कप्तान ज्ञानेन्द्र मल्लले भुटान विरुद्ध १०७ रन प्रहार गरेका थिए ।
दिपेन्द्रको एक हप्ताको अन्तरालमा यो दोश्रो शतक हो । यस अघि उनले पपुवा न्यु गिनी विरुद्धको एकदिवसीय शृंखलामा शतक प्रहार गरेका थिए । आजको शतक पछि दिपेन्द्र पूर्व कप्तान पारस खड्का पछि नेपालको तर्फबाट एकदिवसीय र ट्वान्टी ट्वान्टीमा शतक प्रहार गरे दोश्रो खेलाडी बनेका छन् । पारसले युएई विरुद्ध एकदिवसीय र सिंगापुर विरुद्ध ट्वान्टी ट्वान्टीमा आफ्नो शतक पुरा गरेका थिए ।
नेपालको तर्फबाट दिपेन्द्र बाहेक रोहित कुमार पौडेलले ३४ बलमा ५१, आसिफ शेखले १८, कुशल भुर्तेललेल १२ रन बनाएर आउट भए भने आदिल अन्सारीले १४ रनको पारी खेले ।