मध्यक्रमका ब्याटर दिपेन्द्र सिंह ऐरीले किर्तिमानी शतक प्रहार गर्दा घरेलु टोली नेपालले त्रिकोणात्मक शृंखला अन्तर्गत समुह चरणको अन्तिम खेलमा मलेसिया विरुद्ध कीर्तिमानी योगफल बनाएको छ ।
खेलमा टस हारेर पहिले ब्याटिङ गरेको नेपालले २० ओभरमा पाँच विकेट गुमाएर २२३ रन बनायो । यो नेपालको ट्वान्टी ट्वान्टी अन्तर्राष्ट्रिय खेलमा तेश्रो ठुलो योगफल हो ।
नेपालको तर्फबाट चौथो नम्बरमा ब्याटिङ गर्न आएका दिपेन्द्रले अविजित रहँदै ५७ बलमा १० चौका र ६ छक्काको मद्दतमा सर्वाधिक ११० रन बनाए । दिपेन्द्रको यो नेपालको तर्फबाट सर्वाधिक स्कोर हो । यस अघि नेपालको तर्फबाट पूर्व कप्तान ज्ञानेन्द्र मल्लले भुटान विरुद्ध १०७ रन प्रहार गरेका थिए ।
दिपेन्द्रको एक हप्ताको अन्तरालमा यो दोश्रो शतक हो । यस अघि उनले पपुवा न्यु गिनी विरुद्धको एकदिवसीय शृंखलामा शतक प्रहार गरेका थिए । आजको शतक पछि दिपेन्द्र पुर्व कप्तान पारस खड्का पछि नेपालको तर्फबाट एकदिवसीय र ट्वान्टी ट्वान्टीमा शतक प्रहार गरे दोश्रो खेलाडी बनेका छन् । पारसले युएई विरुद्ध एकदिवसीय र सिंगापुर विरुद्ध ट्वान्टी ट्वान्टीमा आफ्नो शतक पुरा गरेका थिए ।
नेपालको तर्फबाट दिपेन्द्र बाहेक रोहित कुमार पौडेलले ३४ बलमा ५१, आसिफ शेखले १८, कुशल भुर्तेललेल १२ रन बनाएर आउट भए भने आदिल अन्सारीले १४ रनको पारी खेले ।