मध्यक्रमका ब्याटर टोनी उराले छक्काको वर्षा गर्दा पपुवा न्यु गिनीले ट्वान्टी ट्वान्टी शृंखला अन्तर्गतको आफ्नो अन्तिम खेलमा मलेसियालाई आठ विकेटले पराजित गरेको छ ।
जितसँगै पिएनजीको फाइनल खेल्ने आशा जीवित बनेको छ । यस अघि नेपालले फाइनलमा स्थान सुरक्षित गरेको छ भने भोलि हुने समुह चरणको अन्तिम खेलले मलेसिया र पिएनजीको फाइनलको निर्णय हुनेछ । मलेसियाले नेपाललाई पराजित गरेको खण्डमा फाइनलमा स्थान सुरक्षित गर्नेछ भने मलेसियाले हारेको खण्डमा पिएनजीले नेपालसँग फाइनल खेल्ने छ ।
कप्तान असद भाला र उराले अर्धशतक प्रहार गर्दा १९७ रनको लक्ष्य पछ्याएकोपिएनजीले १३ बल अगाडि दुई विकेट गुमाएर लक्ष्य पार गर्यो ।\
पिएनजीको जितमा उराले ३४ बल खेल्दै दुई चौका र १० छक्का प्रहार गर्दै सर्वाधिक ८६ रन बनाए भने कप्तान भालाले ५१ बलमा ७४ रनको पारी खेले । ६२ रनमा दुई विकेट गुमाएको पिएनजीलाई सहज जित दिलाउने क्रममा उरा र भालाले तेश्रो विकेटका लागि १३५ रनको साझेदार गरे ।
पहिलो बलमा नै लेगा सिकालाई गुमाएर खराब सुरुवात गरेको पिएनजीको लागि भाला र चार्ल्स अमिनीले दोश्रो विकेटका लागि ६२ रन जोड्दै उनीहरुको पारी उकासे । अमिनी २८ रनमा पेभेलियन फर्किए ।
यस अघि खेलमा टस हारेर पहिले ब्याटिङ गरेको मलेसियाले कप्तान अहमद फैज र सैयद अजिजको अर्धशतकमा पुरै २० ओभर खेल्दै दुई विकेट गुमाएर १९६ रन बनायो ।
मलेसियाको लागि अजिजले ३५ बलमा सर्वाधिक ६४ रन बनाउँदा कप्तान फैजले ४३ बलमा ६३ रनको पारी खेले । त्यस बाहेक जुबैदजुल्किफ्लेले २२ बलमा समान ४-४ चौका र छक्का सहित आक्रामक ४६ रन बनाए ।