करणको ह्याट्रिकमा नेपाल फाइनलमा 

तीब्र गतिका बलर करण केसीले किर्तिमानी बलिङ गर्दा पपुवा न्यु गिनीलाई ३७ रनले पराजित गर्दै नेपाल घरेलु मैदानमा जारी त्रिकोणात्मक शृंखलाको फाइनलमा प्रवेश गरेको छ । लगातार तीन खेल जित्दा नेपालले एक खेल अगावै फाइनलमा आफ्नो स्थान सुरक्षित गर्न सफल भएको छ ।

नेपालको जितमा तीब्र गतिका बलर करण केसीले ह्याट्रिक सहित सर्वाधिक पाँच विकेट हात पार्दा २०४ रनको विशाल लक्ष्य पछ्याएको पिएनजी १९ दशमलब चार ओभरमा १६६ रनमा समेटिन पुग्यो ।

करण नेपालको लागि ट्वान्टी ट्वान्टी अन्तर्राष्ट्रिय खेलमा ह्याट्रिक लिने पहिलो बलर बनेका छन् भने पाँच विकेट लिने पनि पहिलो बलर बन्न सफल भएका छन् । करणले नेपालको लागि २० औ ओभर बलिङ गर्दै दोश्रो, तेश्रो  र चौथों बलमा विकेट निकाल्दै ह्याट्रिक पुरा गरेका हुन् ।

करण बाहेक नेपालको जितमा सोमपाल कामी र अविनाश बोहराले समान २-२ तथा सन्दिपले एक विकेट हात पारे ।     

ओपनरद्वय लेगा सिका र असद भाला समान १-१ रनमा आउट हुँदा खराब सुरुवात गरेको पिएनजीको लागि चार्ल्स अमिनीले ६२, टोनी उराले ४३ तथा सेसे बाउले २५ रन जोड्दै आफ्नो टोलीको पारी सम्हाले । तर त्यस पछि ब्याटिङमा आएका अन्य ब्याटरले उल्लेख्य योगदान दिन सकेनन् ।   

मध्यक्रमका ब्याटर दिपेन्द्र सिंह ऐरीको अर्धशतक र आदिल आलमको आक्रामक पारीमा नेपालले त्रिकोणात्मक शृंखला अन्तर्गत आफ्नो तेश्रो खेलमा पपुव न्यु गिनीलाई २०४ रनको विशाल लक्ष्य दिएको छ ।

खेलमा टस हारेर पहिले ब्याटिङ गरेको नेपाल पुरै २० ओभर खेल्दै सात विकेट गुमाएर २०३ रन बनायो ।

नेपालको तर्फबाट दिपेन्द्रले ३३ बल खेल्दै सर्वाधिक ६६ रन बनाए भने । उनले आफ्नो पारीमा तीन चौका र चार छक्का प्रहार गरे । 

दिपेन्द्र बाहेक रोहित कुमार पौडेलले २३ बलमा ४१, आसिफ शेखले २९ बलमा ३८ तथा आजको खेलमा नेपालको लागि डेब्यु गरेका आदिलले ११ बलमा ३१ रनको आक्रामक पारी खेले । आदिलले नोर्मन भानुवाको एकै ओभरमा लगातर तीन छक्का प्रहार गरे ।

अन्तिम ओभरमा तीन विकेट लिएका पिएनजीका कबुआ मोरेले सर्वाधिक तीन विकेट लिए भने रिले हेकुरेले दुई विकेट आफ्नो नाममा दर्ता गराए ।