ट्वान्टी ट्वान्टी त्रिकोणात्मक शृंखला अन्तर्गत दोश्रो खेलमा मलेसियाले पपुवा न्यु गिनी माथि आठ रनको रोमान्चक जित हात पारेको छ ।
पहिले ब्याटिङ गर्दै मलेसियाले दिएको १८१ रनको लक्ष्य पछ्याएकोपिएनजीले १९ दशमलब तीन ओभर खेल्दै आफ्ना पुरै विकेट गुमाएर १७२ रन भन्दा जोड्न सकेन ।
मलेसियाको जितमा खेलको प्लेयर अफ द म्याच घोषित शर्विनमुनियान्डे ३२ रन खर्चिएर सर्वाधिक चार विकेट हार पार्दा मुहम्मद वफिक र पवनदिप सिंहले समान ३-३ विकेट लिए । निकै किफायती बलिङ गरेका वफिकले चार ओभरमा मात्र १४ रन खर्चिए भने सुरुवाती तीन विकेट हात पारेका पवनदिपले चार ओभर नै बलिङ गर्दै ३० रन दिए ।
ओपनरद्वय लेगा सिका र कप्तान असद भाला क्रमश ६ र ११, चार्ल्स अमिनी पाँच तथा सेसे बाउ शून्य रनमा आउट हुँदा ३७ रनमा चार विकेट गुमाएर निकै खराब सुरुवातको पिएनजीको लागि टोनी उरा र नोर्मनभानुवाले पाँचौं विकेटको लागि ७४ रनको साझेदारी गर्दै पारी सम्हाले ।
आक्रामक पारी खेल्दै ३५ बलमा ५६ रन बनाएका उरा र २५ बलमा ४५ रनको पारी खेलेका भानुवा क्रमश मुनियान्डे र वफिकको बलमा आउट हुँदा मलेसियाको जितको आधार बन्यो । त्यस पछि आएका अन्य ब्याटरले ठुलो पारी खेल्न नसक्दा हारको सामना गर्न बाध्य भयो ।
विकेट किपर सिमोन अटाईले ६ बलमा १७ तथा नोसैनापोकाना ६ बलमा नौं रन जोड्दै पिएनजीलाई जित नजिक पुर्याए पनि दुबै मुनियान्डेको बलमा आउट हुँदा आठ रनको झिनो हारको सामना गर्न बाध्य भयो ।
यस अघि खेलमा टस जितेर पहिले ब्याटिङ गरेको मलेसियाको लागि ओपनर विरनदिप सिंह र कप्तान अहमद फैजले अर्धशतकीय पारी खेल्दा मलेसियाले २० ओभरमा तीन विकेट गुमाएर १८० रनको विशाल योगफल बनाउन सक्यो ।
ओपनर जुबैदीशुल्किफल चार रनमा आउट भए पनि विरनदिपले अविजित ५९ तथा फैजले ५६ रन जोड्दै मलेसियाको पारी सम्हाले । दोश्रो विकेटका लागि ९५ रनको साझेदारी गरेका फैज र विरनदिपले क्रमश २७ बलमा पाँच चौका र तीन छक्का तथा ५२ बलमा समान २-२ चौका र छक्का प्रहार गरे ।
त्यस बाहेक चौथों नम्बरमा ब्याटिङ गर्न आएका सैयद अजिजले पारीको अन्तिम बलमा आउट हुनु अघि २६ बल खेल्दै पाँच चौका र दुई छक्काको मद्दतमा ४७ रन बनाए ।
पिएनजीकानोर्मनभानुवाले सर्वाधिक दुई विकेट हात पारे ।
त्रिकोणात्मक शृंखलाको तेश्रो खेलमा भोली नेपालले मलेसियाको सामना गर्नेछ ।