अवे खेलमै स्पेनिस ला लिगाको शिर्ष स्थानमा रहेको रियल म्याड्रिडलाई ४–० को फराकिलो जित हात पार्दै बार्सिलोनाले एल क्लासिकोमा लामो समयपछि आफ्नो चीर प्रतिद्वन्दीमाथि दबदबा कायम गरेको छ ।
आइतबार भएको खेलमा पिएरे–एमेरिक औबामेयाङले दुई गोल गर्नुका साथै अर्को एकमा असिस्ट गरेपछि अर्जेन्टिनी सुपरस्टार लियोनल मेस्सीपछिको बार्सिलोनाले रियललाई स्तब्ध बनायो । रियलले यसअघिका पाँच वटै एल क्लासिकोमा बार्सिलोनालाई हराएको थियो ।
आइतबार बार्सिलोनाले सबै पराजयको एकै पटक बदला लिने गरि जित हात पारेको छ । बार्साको लागि जित किन पनि महत्वपूर्ण रह्यो भने सिजनको शुरुवातमा मिड टेबलमा रहेको टोली अब दोश्रो स्थान नजिक पनि पुगेको छ ।
ला लिगामा रियल ६६ अंकका साथ शिर्ष स्थानमा कायमै रहेको छ भने दोश्रो स्थानको सेभियाको ५७ अंक छ । एक खेल कम खेलेको बार्सिलोनाको ५४ अंक छ । भारी गोल अन्तर रहेको बार्सिलोनाको तुलनामा एट्लेटिको म्याड्रिडको पनि ५४ अंक छ तर उसले एक खेल बढी खेलेको छ ।
बिवादपछि उत्कृष्ट फर्ममा फर्किएका फ्रेञ्च औस्माने डेम्बेलेको दुई क्रसमा औबामेयाङ र रोनाल्ड अरुजोले गोल गर्दै बार्सालाई पहिलो हाफमै २–० को अग्रता दिलाएका थिए । दोश्रो हाफको दोश्रो मिनेटमै औबामेयाङको फ्लिकमा फेरान टोरेसले तेश्रो गोल गरे । त्यसको चार मिनेटमै टोरेसको पासमा औबामेयाङले चिप गर्दै बार्साको फराकिलो जित सुनिश्चित गरेका थिए ।
पछिल्लो १२ खेलमा अपराजित रहेको बार्साको लागि ला लिगा उपाधि अभियानमा ढिलो भइसकेपनि जाभी हर्नान्डेजले परिवर्तन गरेको टोली पछिल्लो केही महिनाको प्रदर्शनले निकै खुशी भने हुनेछ । रियलमाथिको रवाफिलो जित उसको लागि यो सिजन बिशेष रहनेछ ।
“हामी उपाधि जित्न सक्छौं या सक्दैनौं थाहा छैन । शायद धेरै ढिलो पनि भइसक्यो तर यो जित हाम्रो लागि निकै ठूलो हो । हामी रियलभन्दा धेरै राम्रो खेलिरहेको छौं । अवे खेलमा होम टिम जसरी खेल्यौं र बार्सा प्रशिक्षक मात्र नभएर फ्यानको रुपमा पनि आज हामीले आनन्द उठाउने दिन हो,” जाभीले भने ।
