ओपनर ज्योति पाण्डेले अर्को निर्णायक इनिङ्गस खेलेपछि नेपाल एपिएफ क्लब सुदुर पश्चिम प्रदेशमाथि सहज जित हात पार्दै मेयर महिला च्याम्पियनसिपको उपाधि रक्षा गर्न सफल भएको छ ।
पहिलो ब्याटिँग गरेको सुदुर पश्चिमले तारिफयोग्य प्रदर्शन गर्दै २० ओभरमा चार विकेटको क्षतिमा १ सय १३ रनको चुनौतिपूर्ण योगफल खडा गर्यो । तर ब्याटरहरुको प्रदर्शनलाई सुदुरको बलरहरुले दोहोर्याउन सकेनन् । यस क्रममा ज्योतिले दुई प्रमुख साझेदारी गरेपछि एपिएफले मात्र १५ दशमलव ५ ओभरमा दुई विकेट गुमाउदै जित हात पार्यो ।
सुदुरले लगातार तेश्रो पटक राष्ट्रिय क्रिकेटको फाइनलमा एपिएफसँग हार व्यहोरेको हो । गत संस्करणको मेयर कपको फाइनलमा पनि एपिएफसँग पराजित सुदुर प्रधानमन्त्री कपको फाइनलमा उपाधि भिडन्तमा चुकेको थियो ।
प्रतियोगिताको सर्वाधिक रन बनाउने खेलाडीहरुको शिर्ष स्थानमा रहन सफल ज्योतिले पहिलो विकेटका लागि कप्तान सीता रानामगरसँग ५८ रन जोडिन् । सीताको विकेट पछि उनले इन्दु बर्मासँग अर्को ३९ रन जोडेकी थिइन् ।
ज्योति ४४ बलमा ४३ रन जोड्दै लक्ष्मी साउदको शिकार बनिन् । उनले पाँच चौका प्रहार गरिन् । २२ बलमा तीन चौका प्रहार गरेकी सीताले १९ रन बनाइन् । इन्दु २४ बलमा दुई चौका र एक छक्काको मद्दतमा २९ रन बनाउदै नटआउट रहिन् ।
ज्योतिले प्रतियोगितामा एक अद्र्धशतकसहित कुल १ सय ५५ रन बनाइन् ।
यसअघि पहिलो ब्याटिँग गरेको सुदुरलाई लयमा रहेकी ओपनर बिन्दु रावलले चाहे अनुरुपको शुरुवात दिलाउने क्रममा पहिलो विकेटका लागि रेवती धामी (१०) सँग ४८ रन जोडेकी थिइन् । चार रनको अन्तरमा दुवै ओपनरलाई गुमाएपछि डली भट्ट र कविता कुँवरले सुदुरको इनिङ्गस सम्हालेका थिए ।
उनीहरुले तेश्रो विकेटका लागि ५२ रनको साझेदारी गरे । डलीले २५ बलमा चार चौका र एक छक्काको मद्दतमा ३६ रन बनाइन् । बिन्दुले ३६ बलमा ३७ रन बनाउदा पाँच चौका हिर्काइन् ।
कविता २५ बलमा २४ रन बनाउदै नटआउट रहिन् । सुष्मा श्रेष्ठले दुई विकेट लिँदा एपिएफले दुई खेलाडीलाई रनआउट गरेको थियो । खेलमा एपिएफले चार अतिरिक्त रन मात्र दिँदा सुदुरले भने १८ रन खर्चिएको थियो ।