नेपाल आर्मीले नेपाल बास्केटबल लिगको दोश्रो संस्करणको फाइनलमा टाइम्ससँग व्यहोरेको हारको बदला लामा टेन्डी शेर्पा स्मृति राष्ट्रिय बास्केटबल प्रतियोगितामा पुरा गरेको छ ।
दशरथ रँगशाला कभर्ड हलमा आर्मीले बिहिवार भएको फाइनलमा टाइम्समाथि ९०–५८ को एकपक्षीय जित हात पार्यो । आर्मी २०१९ मा नेपाल बास्केटबल लिगको दोश्रो संस्करणमा टाइम्ससँग उपाधि भिडन्तमा पराजित भएको थियो ।
महिलातर्फ नेपाल पुलिस क्लब च्याम्पियन बन्यो । फाइनलमा पुलिसले रोयल बास्केटबल एकेडेमीलाई ५२–४९ ले हरायो । दुवैतर्फको च्याम्पियन र उपबिजेताले समान ५० हजार र २५ हजार नगद प्राप्त गरे ।
आर्मीले शुरुवातदेखि नै पूर्ण रुपमा खेल आफ्नो नियन्त्रणमा राखेको थियो । पहिलो दुई क्वार्टर २२–१० र २४–२० ले आफ्नो पक्षमा पार्दै आर्मीले हाफ टाइमअघि १६ अंकको अग्रता बनाइसकेको थियो । तेश्रो क्वार्टरमा पनि १७–१६ को झिनो अग्रता लिएको आर्मीले अन्तिममा २७–१२ को प्रदर्शन गर्यो ।
आर्मीका लागि आयुष सिँहले सर्वाधिक २७ अंकको योगदान दिए । टाइम्सका लागि सदिश प्रधानले १७ पोइन्ट गरे ।
प्रतिस्पर्धात्मक महिला तर्फको फाइनलमा पुलिस र रोयल दुवैले ८–८ अंकबाट शुरुवात गरेका थिए । दोश्रो क्वार्टरमा पुलिसले २५–२० को प्रदर्शन गर्दा पाँच अंकको महत्वपूर्ण अग्रता लियो । तेश्रो क्वार्टर पनि १४–११ ले आफ्नो पक्षमा पारेको पुलिस जितर्फ अग्रसर बनेको थियो ।
अन्तिम क्वार्टरमा रोयलले १५–१० को अग्रता लिएपनि उसको हातबाट उपाधि फुत्किसकेको थियो । राउण्ड रोबिन लिगमा पुलिसलाई पराजित गर्दै रोयल बिजेताको रुपमा फाइनल पुगेको थियो । लिगमा उपबिजेता पुलिसलाई फाइनलमा उपाधि दिलाउन अनुषा मल्लले १९ पोइन्ट स्कोर गरिन् ।
रोयलका लागि रोशनी श्रेष्ठले १४ अंक जोडिन् । अनुषा टुर्नामेन्ट एमभीपी बनिन् भने पुरुषतर्फ बिनोद महर्जन एमभीपी रहे । रोयलका सुदिप पौडेल क्षेत्री र रुपन्देहीकी दिपिका गुरुङ उदीयमान खेलाडी घोषित भए ।