बलरहरुको उत्कृष्ट प्रदर्शनलाई साथ दिदै कुशल भुर्तेलले आफ्नो पाचौं ट्वान्टी ट्वान्टी अन्तर्राष्ट्रिय अद्र्धशतक पुरा गर्दा नेपालले ओमानलाई ९ विकेटको फराकिलो अन्तरले पराजित गर्दै ट्वान्टी ट्वान्टी बिश्वकप छनोटको अन्त्य गरेको छ ।
जितका लागि ८८ रनको झिनो लक्ष्य नेपालले १६ दशमलव २ ओभरमा हात पार्यो । आफ्नो ११ औं ट्वान्टी ट्वान्टी अन्तर्राष्ट्रिय खेलिरहेका कुशलले अर्को अद्र्धशतक पुरा गर्दै नटआउट इनिङ्गस खेलेका कुशलले ५३ बलमा ५५ रन बनाए ।
कुशलले आसिफ शेख (१३) सँग पहिलो विकेटका लागि ५० रनको साझेदारी गर्दै नेपाललाई सहज जिततर्फ धकेलेका थिए । आईसीसीको पछिल्लो बिश्व बरियतामा ३९ औं स्थानमा उक्लिएका कुशलले दुई छक्का र तीन चौका प्रहार गरे ।
प्रतियोगितामा एक शतकसहित २ सय ५ रन बनाएका कुशलको छनोटमा प्रदर्शन तथ्यांकका आधारमा उत्कृष्ट रह्यो । ५ खेलमा उनको औषत १ सय २ दशमलव ५० को औषतमा रह्यो भने सबैभन्दा बढी रन बनाउने खेलाडीहरुको सुचीमा उनी तेश्रो नम्बरमा रहे ।
कुशलसँग दोश्रो विकेटका लागि ४० रन जोडेका आरिफ शेखले २७ बलमा २१ रन बनाए । ओमानका लागि एक मात्र विकेट कप्तान जिशान मक्सुदले लिए । नेपालले ओमानलाई उसकै घरमा लगातार तीन वटा खेलमा पराजित गरेको हो । यसअघि उसले चारदेशीय श्रृंखला र छनोटको समुह चरणमा हराएको थियो ।
यसअघि कप्तान सन्दिप लामिछानेले उत्कृष्ट बलिँग प्रदर्शन गरेपछि ओमान २० ओभरमा ९ विकेटको क्षतिमा ८७ रनमै रोक्किएको थियो । घरेलु टोली लगातार दोश्रो पटक नेपालबिरुद्ध १ सय रनभन्दा कममा समेटिएको हो । समुह चरणको पहिलो खेलमा नेपालले ओमानलाई ७८ रनमै अलआउट गर्दै लो–स्कोरिङ्ग खेलमा ३९ रनको फराकिलो जित हात पार्न सफल भएको थियो ।
दोश्रो ओभरमै जतिन्दर सिँहलाई गुमाएको ओमानले १९ रनमै चार विकेट गुमाएको थियो । कप्तान जिशान मक्सुदले केही बेर नेपाललाई रोक्ने प्रयास गरेपनि उनी २१ रन बनाई आरिफ शेखको बलमा आउट भएका थिए ।
सागर ढकालले आफ्नो पहिलो अन्तर्राष्ट्रिय विकेट लिने क्रममा आयान खान (१६) लाई आसिफ शेखको हातबाट स्टम्पिँग गराउदा अर्को ओभरको पहिलो बलमै सन्दिप गाउड रनआउट हुन पुगेका थिए ।
सन्दिपले आक्रमक ब्याट्स्म्यान नसिम खुशी र नेस्टर धाम्बाको विकेट लिदै तेश्रो तीन विकेटको प्रदर्शन गरे । उनले चार ओभरमा मात्र १३ रन खर्चिएका थिए । सन्दिपलाई छक्का प्रहार गरे लगत्तै एलबिडब्लु धरापमा परेका खुशीले १५ रन बनाए ।
सन्दिप प्रतियोगितामा सबैभन्दा बढी विकेट लिने खेलाडीहरुको सुचीमा शिर्ष स्थानमा रहे । उनको नाममा १२ विकेट रहेको छ । ओमानका लागि कप्तान मक्सुदले २८ बलमा तीन चौकाको मद्दतमा २१ रन बनाए । ओमानको तीन वटै चौका उनको नाममा रह्यो । कमल सिँह ऐरि र अविनाश बोहोराले पनि नेपालका लागि १–१ विकेट लिए ।