ट्वान्टी ट्वान्टी विश्वकप छनोट अन्तर्गत तेश्रो स्थानको लागि हुन लागेको खेलमा नेपालले पहिले बलिङ गर्ने भएको छ । आजको खेलमा ओमानले टस जितेर पहिले ब्याटिङ गर्ने निर्णय लिएको हो ।
सेमिफाइनल खेलमा युएईसँग ६८ रनको फराकिलो अन्तरको हार बेहोर्दा नेपालको विश्वकपको सपना चकनाचुर भएको थियो । आजको खेलमा जित निकाल्दै नेपाल सुखद अन्त्य गर्न चाहन्छ ।
आजको खेलमा नेपालले एक मात्र परिवर्तन गरेको छ । तीब्र गतिका बलर जितेन्द्र मुखियाको स्थानमा बायाँ हाते स्पिनर सागर ढकालले सुरुवाती ११ मा स्थान बनाएका छन् ।
टुरको सुरुवात गर्दा नेपालले चार देशीय ट्वान्टी ट्वान्टी श्रृंखलामा घरेलु टोली बिरुद्ध खेलेको थियो भने विश्वकप छनोटमा पनि दुवै टोली एकै समुहमा रहेको थियो । दुवै पटक नेपालले ओमान बिरुद्ध शानदार जित हात पारेको थियो । नेपाल लगातार तेश्रो जित हात पार्दै ओमान माथि अपराजित यात्रालाई निरन्तरता दिन चाहन्छ । गत सेप्टेम्बर १९ क्रिकेट विश्वकप लिग टु अन्तर्गतको अन्तिम खेलमा ओमानलाई ७ विकेटले हराएको नेपाल लगातार तीन जितको श्रृंखलामा रहेको छ ।
नेपाली टोली :- सन्दिप लामिछाने (कप्तान),आसिफ शेख, आरिफ शेख, कुशल भुर्तेल, ज्ञानेन्द्र मल्ल, दिपेन्द्र सिंह ऐरी, अविनाश बोहरा, सागर ढकाल, लोकेश बम, कमल सिंह ऐरी, कुशल मल्ल