आईसीसीको नयाँ नियम, ११ जनाको सट्टामा नौ जना मात्र पनि मैदानमा उतार्न सकिने

अर्को महिनाबाट न्युजिल्यान्डमा सुरु हुन लागेको महिला विश्वकपमा अन्तर्राष्ट्रिय क्रिकेट परिषद (आईसीसी) नयाँ नियम लागू गर्ने भएको छ ।

यदि कुनै पनि टोलीमा खेलाडीहरूलाई कोरोना संक्रमण भएको खण्डमा नौ जना खेलाडी राखेर मात्र भए पनि खेल खेलाउन सकिने नियम लागू गर्न लागेको हो । आईसीसीका प्रतियोगिता प्रमुख क्रिस टेट्लीले यसको पुष्टि गर्दै कोरोनाका कारण खेल नियममा परिवर्तन गर्न लागिएको जनाए । त्यस्तै उनले कुनै टोलीमा कोरोना संक्रमण लागेको खण्डमा नौ जना मात्र खेलाडी भयो भने दुईजना टोलीका सदस्य र कोचिङ स्टाफले पनि फिल्डिङ गर्न पाउने भएको छ ।     

“अहिले कोरोना संक्रमण हुनेको संख्या वृद्धि भएका कारण हामीले खेल नियममा परिवर्तन गर्न लागेका हौँ । कुनै टोलीमा कोरोना संक्रमण फैलिएर नौ जना सम्म खेलाडी खेल्न मिल्ने भएको अवस्थामा हामीले नौ जनालाई मात्र खेलाउन सकिने गरेर नियम परिवर्तन गरेका छौँ,” टेट्लीले भने । “त्यस्तै कुनै टोलीमा टोलीका सदस्य र कोचिङ स्टाफ महिला छन् भने उनीहरुले खेलमा फिल्डरका रुपमा मैदानमा प्रवेश पाउने छन् । तर उनीहरुले ब्याटिङ र बलिङ भने गर्न पाउने छैनन् । यो नियम खेल सञ्चालन होस् भन्ने सोचेर बनाइएको हो ।” 

आईसीसीले विश्वकप लगायत आफूले आयोजना गर्ने प्रतियोगिताहरूमा १५ जना खेलाडीलाई मात्र स्थान दिने गर्दछ । तर यस पटक कोरोनाका कारण उसले थप तीन जना खेलाडीलाई टोलीमा वैकल्पिक खेलाडीका रुपमा राखिएको छ र कुनै पनि उनीहरूले अन्तिम १४ मा स्थान बनाउन सक्ने छन् । 

हाल न्युजिल्यान्डमा ओमिक्रन भेरियन्टको कोरोनामा व्यापक वृद्धि भएका कारण पनि आईसीसीले यो नियम लागू गरेको हो । पछिल्लो समय न्युजिल्यान्डमा दैनिक पाँच हजार भन्दा धेरैलाई कोरोना संक्रमण भएको तथ्यांक छ ।  

आगामी मार्च चारमा सुरु हुने महिला विश्वकपको उद्घाटन खेलमा आयोजक न्युजिल्यान्ड र वेस्ट इन्डिज भिड्ने छन् ।