नेपाली महिला राष्ट्रिय टोलीकी पुर्व कप्तान नेरी थापाले अन्तिम ओभरमा ह्याट्रिक लिएपछि लुम्बिनी प्रदेशले सनसनीपूर्ण महिला मेयर च्याम्पियनसिपको खेलमा दुई रनको जित हात पारेको छ ।
११ रनमा ५ विकेट लिएपछि लुम्बिनीले ललितपुर मेयर ११ माथि संघर्षपूर्ण जित हात पार्यो । पहिलो ब्याटिँग गरेको लुम्बिनीलाई मेयर ११ ले चार विकेटको क्षतिमा ९४ रनमै रोकेको थियो ।
जित हातमा ल्याइसकेको मेयर ११ ले अन्तिम दुई ओभरमा खेल गुमायो । उसले ९ विकेटको क्षतिमा ९२ रन मात्र बनाउन सक्यो । मेयर ११ लाई अन्तिम १२ बलमा मात्र १५ रनको आवश्यकता रहेको थियो ।
सुष्मिता भुषालले गरेको १९ औं ओभरमा मेयर ११ ले ८ रन त बटुल्यो तर उसले लगातार कप्तान सरस्वती चौधरी र आरती बिडारीलाई गुमाएको थियो । नेरीको अन्तिम ओभरको पहिलो बलमा अस्मिनना कर्माचार्यले एक रन लिएपछि मेयर ११ लाई अन्तिम ५ बलमा ६ रनको आवश्यकता रह्यो ।
तर नेरीले लगातार खुशी डँगोललाई एलबिडब्लु ट्रयाप गर्नुका साथै शीला क्षेत्री र अलिशा यादवलाई बोल्ड गर्दै ह्याट्रिक पुरा गरेकी थिइन् । अन्तिम दुई बलमा मेयर ११ ले मात्र तीन रन बटुल्न सक्यो ।
प्लेयर अफ द म्याच नेरीले चार ओभरमा मात्र ८ रन खर्चदै चार विकेट हात पारिन् । अस्मिना २१ बलमा दुई चौकका साथ २० रनमा नटआउट रहिन् । मेयर ११ का लागि ओपनर कञ्जन श्रेष्ठले सर्वाधिक २२ रन बनाएकी थिइन् । उनले ३६ बलमा एक चौका प्रहार गरिन् ।
लुम्बिनीका लागि कृतिका मराशिनीले पनि तीन विकेट हात पारिन् ।
यसअघि पहिलो ब्याटिँग गरेको लुम्बिनीले ११ रनमै दुई विकेट गुमाएपछि सरस्वती जिएमले सम्हालेकी थिइन् । उनले नेरी (१५) सँग ३७ र चौथो विकेटका लागि सरस्वती पुनसँग ४३ रनको निर्णायक साझेदारी गरेकी थिइन् ।
सरस्वती जिएमले ४७ बलमा दुई चौका प्रहार गर्दै ३१ रन बनाइन् भने पुनले २७ बलमा एक चौकाको मद्दतमा २० रन जोडिन् । मेयर ११ ले २२ अतिरिक्त दिएको थियो । उसका लागि सुमन खतिवडाले तीन र शीलाले एक विकेट लिएकी थिइन् ।
