सर्बियन दुसान भ्लाहोभिच च्याम्पियन्स लिग डेब्युमा सबैभन्दा छिटो गोल गर्ने खेलाडी बनेपनि इटालियन टोली युभेन्टस च्याम्पियन्स लिग अन्तिम १६ को आफ्नो पहिलो लेगमा स्पेनिस क्लब भिलारियालसँग १–१ गोलको बराबरीमा रोक्किएको छ ।
गत महिना फियोरेन्टिनाबाट ५८ मिलियन पाउण्डमा युभेन्टस आएका २२ बर्षिय भ्लाहोभिचले ड्यानिलोको लामो पासलाई बटुल्दै ३२ सेकेण्डमै गोल गरेका थिए । यस क्रममा भ्लाहोभिचले २७ बर्ष पुरानो किर्तिमान भँग गरेका हुन् ।
यसअघि च्याम्पियन्स लिग डेब्युमा सबैभन्दा छिटो गोल ३८ सेकेण्डमा रहेको थियो । १९९५ मा एन्डी मोलरले बोरुसिया डर्टमण्डका लागि युभेन्टसबिरुद्ध उक्त किर्तिमान कायम राखेका थिए ।
“मेरो लागि डेब्युमै गोल गर्नु नै ठूलो कुरा भइसकेको छ । म निकै भावुक भए । तर हामी खेल जित्न असफल रहेकोमा भने म पूर्ण रुपमा सन्तुष्ट हुन सक्दिन । व्यक्तिगत रुपमा मैले यो खेल नै बिर्सिसके, अब आगामी दिनहरुका बारे सोच्ने हो,” भ्लाहोभिचले भने ।
भ्लाहोभिचका लागि मँगलवारको खेल नै युरोपमा उनको सबैभन्दा ठूलो खेल थियो । यसअघि उनले १६ बर्षे फुटबलरको रुपमा घरेलु क्लब पार्टिजन–बेलग्रेडका लागि युरोपा लिग छनोट खेलेका थिए ।
अवे खेलमा भ्लाहोभिचको गोलले ३२ सेकेण्डमै अग्रता लिएपनि त्यसको फाइदा उठाउन असफल रह्यो । ६६ औं मिनेटमा भिलारियालले बराबरी गर्यो । ड्यानी परेजोले एटिने कापुको एरियल पासमा फिनिसिँग गर्दै खेललाई बराबरीमा रोकेका थिए ।
एड्रियन राबियोटलाई स्यामुएल चुकुवेजेमाथि घातक बल गर्दा पनि पहेलो कार्ड मात्रै देखाउदा युभेन्टस १० खेलाडीमा सिमित हुनबाट बचेको थियो । च्याम्पियन्स लिगको नकआउट चरणमा अहिलेसम्म घरेलु मैदानमा नहारेको भिलारियालले निर्णायक गोलका लागि प्रयास गरेपनि स्पेन अन्तर्राष्ट्रिय जेरार्ड मोरेनको अनुपस्थिति खड्किएको थियो ।
