कुशल भुर्तेलले पहिलो ट्वान्टी ट्वान्टी शतक प्रहार गर्र्दै दिपेन्द्र सिँह ऐरिसँग नेपालको लागि कुनै पनि विकेटका लागि किर्तिमानी साझेदारी गरेपछि नेपालले ट्वान्टी ट्वान्टी बिश्वकप छनोट अन्तर्गत आफ्नो दोश्रो खेलमा फिलिपिन्सबिरुद्ध २ सय १८ रनको बिशाल योगफल खडा गरेको छ ।
दुई पुर्व कप्तान पारस खड्का र ज्ञानेन्द्र मल्लपछि ट्वान्टी ट्वान्टी अन्तर्राष्ट्रियमा शतक प्रहार गर्ने तेश्रो ब्याट्स्म्यान बनेका कुशलले गुरभुपिन्दर सिँहको बलमा सिँगल बटुल्दै ५७ बलमा शतक प्रहार गरेका थिए ।
कुशलले ८३ रन बनाएका दिपेन्द्र सिँह ऐरिसँग तेश्रो विकेटका लागि १ सय ७१ रनको बिशाल साझेदारी गरेका थिए । यो नेपालको लागि कुनै पनि विकेटका लागि अहिलेसम्मकै ठूलो साझेदारी हो ।
यस अघिको सबैभन्दा ठूलो साझेदारी पारस र आरिफबीच दोश्रो विकेटका लागि रहेको थियो । पारस र आरिफले सिँगापुरबिरुद्ध ट्राइ नेसन सिरिजमा १ सय ४५ रन जोडेका थिए । त्यही खेलमा पारसले ४९ बलमै शतक प्रहार गरेका थिए ।
अर्को शतक ज्ञानेन्द्रले २०१९ डिसेम्बरमा भुटानबिरुद्ध दक्षिण एसियाली खेलकुदका दौरान प्रहार गरेका थिए । नटआउट रहेका कुशलले ६१ बलमा १३ चौका र एक छक्काको मद्दतमा १ सय ४ रन बनाए ।
दिपेन्द्रले ४७ बलमा ६ चौका र चार छक्काको मद्दतमा ८३ रन बनाए ।
कुशलले ३२ बलमै अद्र्धशतक पुरा गरेका थिए । सिँहले टाउको माथी फालेको नोबलमा विकेटकिपर पछाडीबाट चौका प्रहार गर्दै कुशलले अद्र्धशतक पुरा गरे । उनले आफ्नो आठौं ट्वान्टी ट्वान्टी अन्तर्राष्ट्रिय खेलिरहेका छन् ।
उनको पहिलो चार अद्र्धशतक नेपालमै गत अप्रिलमा भएको त्रिदेशीय ट्वान्टी ट्वान्टी श्रृंखलाका दौरान रहेको थियो । फिलिपिन्सले खेलमा राम्रो शुरुवात गर्दै आसिफ शेख (डक) र कुशल मल्ल (१२) लाई पेभिलियन फर्काएपनि नेपाललाई कुशल र दिपेन्द्र सिँह ऐरिले राम्रो योगफलको आधार बनाए ।
नेपालले अन्तिम १० ओभरमा १ सय २९ रन जोडेको थियो । ड्यानियल स्मिथले अन्तिम ओभरमा मात्र चार रन खर्चेका थिए ।