श्रेयस ऐयरमाथि सवा १२ करोड बर्षा गर्दै टिममा भित्र्याएको कोलकाता नाइट राइडर्सले भारतीय मिडल अर्डर ब्याट्स्म्यानलाई यो सिजनको इण्डिय प्रिमियर लिगको लागि कप्तान नै नियुक्त गरेको छ ।
अपेक्षा गरे अनुसार नै बैँगलोरमा भएको आईपिएल अक्सनमा उनको लागि बिडिँग वार हुँदा कोलाकाताले ऐयरको पूर्व टोली दिल्ली क्यापिटल्सलाई पछि पार्दै टिममा ल्याउन सफल भएको थियो । ऐयर दिल्लीको पनि कप्तान नै रहेका थिए ।
गत सिजन काँधको चोटका कारण शुरुवाती चरण गुमाएका ऐयरले रिसभ पन्तलाई कप्तानी सुम्पेका थिए । ऐयर फर्किएपनि पन्तले नै पुरै सिजन दिल्लीको नेतृत्व हातमा लिएका थिए ।
कोलकाताका मुख्य प्रशिक्षक तथा पुर्व न्युजिल्याण्ड ओपनर ब्रेण्डन म्याक्कुलमले ऐयर भारतको भावी कप्तान रहेको बताउदै यो निर्णयले आफू निकै खुशी भएको बताए । “मैले सँगै नरहेपनि उनको कप्तानी र खेललाई राम्रोसँग नियाल्दै आइरहेको थिए । मलाई लाग्छ उनी कोलकाताको कप्तानको रुपमा निकै उपयुक्त उम्मेदवार थिए,” म्याक्कुलमले भने ।
गत सिजनको कोलकाताको नेतृत्व इंगल्याण्डका एकदिवसीय कप्तान ओइन मोर्गनको हातमा रहेको थियो । तर यो सिजन मोर्गन अक्सनमा नै अनसोल्ड हुन पुगे ।
२०२१ सिजनमा मोर्गनले निकै संघर्षपछि मुम्बई इण्डियन्सलाई रनरेटमा पछि पार्दै आईपिएलको प्लेअफसम्म डोर्याएका थिए । तर एलिमिनेटर खेलमा रोयल च्यालेन्जर्स बैँगलोर र दोश्रो क्वालिफायरमा दिल्ली क्यापिटल्सलाई हराउदै कोलकाता फाइनलसम्म पुग्न सफल भएको थियो ।
फाइनलमा चेन्नई सुपर किंग्ससँग २७ रनले हारेपछि कोलकाता तेश्रो पटक आइपिएलको उपाधि जित्न असफल भएको थियो ।
