उच्च फर्ममा रहेको नेपाली राष्ट्रिय टोलीका ब्याटिँग अलराउण्डर दिपेन्द्र सिँह ऐरि अन्तर्राष्ट्रिय क्रिकेट काउन्सिलको ट्वान्टी ट्वान्टी अन्तर्राष्ट्रिय अन्तर्गत ब्याटिँगको बरियतामा ठूलो छलाँग मार्न सफल भएका छन् ।
आईसीसीले बुधबार जारी गरेको बरियता अनुसार दिपेन्द्र बिश्व बरियतामा ५२ औं स्थानमा अटाएका छन् । ओमानमा सोमबार सम्पन्न चारदेशीय ट्वान्टी ट्वान्टी अन्तर्राष्ट्रिय श्रृंखलामा उत्कृष्ट प्रदर्शन गरेका दिपेन्द्र नेपालबाट अहिलेसम्मकै उच्च बरियता लिने ट्वान्टी ट्वान्टी ब्याट्स्म्यान बनेका हुन् ।
तीन खेलमा दिपेन्द्रले कुल १ सय ४२ रन बनाएका थिए । यस क्रममा उनले ओमानबिरुद्धको पहिलो खेलमा ७३ नटआउट ७३ रन बनाएका थिए भने युएईबिरुद्ध ४१ र आयरल्याण्डबिरुद्ध २८ रन जोडेका थिए । घातक बलिँग पनि गरेका उनले आयरल्याण्डबिरुद्ध चार विकेट पनि लिदै करिअरकै उत्कृष्ट बलिँग प्रदर्शन दिएका थिए ।
यसअघि कुशल भुर्तेलले आगटेको ५५ औं स्थान नेपाली ब्याट्स्म्यानहरुको लागि अहिलेसम्मकै ठूलो स्थान प्राप्त गरेका थिए । कुशल अहिले भने ६५ औं स्थानमा रहेका छन् । उनले ओमानमा मात्र एक खेल खेल्दा आयरल्याण्डबिरुद्ध १५ रन बनाएका थिए ।
यस्तै नेपाली टोलीका कप्तान सन्दिप लामिछाने भने बलरहरुको बरियतामा ६३ औं स्थानमा रहेका छन् ।