आमिर कलीमले पाँच विकेट तथा ओपनर कश्यप प्रजापतीले अविजित अर्धशतक प्रहार गर्दै चार देशीय ट्वान्टी ट्वान्टी शृंखला अन्तर्गत आफ्नो तेश्रो तथा अन्तिम खेलमा युएईले ओमानसँग सात विकेटको हारको सामना गरेको छ ।
यस अघिका दुई खेलमा नेपाललाई २५ तथा टेस्ट राष्ट्र आयरल्याण्डलाई १३ रनले पाखा लगाएको युएईको यस शृंखलामा यो पहिलो हार हो । आफ्नो पहिलो दुई खेलमा नेपालसँग ६ तथा आयरल्याण्डसँग १३ रनको हार व्यहोरेको ओमानले आजको खेलमा भने जित निकाल्न सफल रह्यो ।
ओपनर कश्यप प्रजापतीले अर्धशतकीय पारी खेल्दा १६५ रनको चुनौतिपूर्ण लक्ष्य पछ्याएको ओमानले १९ दशमलब तीन ओभर खेल्दै तीन विकेटको नोक्सानीमा जित हात पार्यो ।
ओपनरद्वय जतिन्दर सिंह र प्रजापतीले ६ ओभरमामा ४८ रन जोड्दै ओमानलाई राम्रो सुरुवात दिलाए । १९ बलमा २२ रन जोडेका जातिन्दर कासिफ दाउदको बलमा एलबीडब्लुको शिकार भए पनि प्रजापती र शोएब खानले ७१ रन जोड्दै ओमानलाई जित नजिक पुर्याए ।
अविजित रहेका प्रजापतीले ५३ बल खेल्दै आठ चौकाको मद्दतमा ६९ रन जोड्दै ओमानको जित सुनिश्चित गरे ।
यस अघि बायाँ हाते स्पिनर आमिर कलीमले घातक बलिङ गर्दै पाँच विकेट हात पार्दै आक्रामक सुरुवात गरेको युएईले पुरै २० ओभर खेल्दै आठ विकेटको नोक्सानीमा १६४ रन बनायो ।
युएईको तर्फबाट ओपनर मुहम्मद वसिमले आक्रामक पारी खेल्दै ४४ बलमा आठ छक्का र तीन चौकाको मद्दतमा ८४ रनको पारी खेले । अर्का ओपनर चिराग सुरीसँग वसिमले पहिलो विकेटका लागि ३३ तथा रोहन मुस्तफासँग दोश्रो विकेटका लागि आठ ओभरमा ८२ रनको साझेदारी गर्दै युएईलाई विशाल योगफल तर्फ लगे ।
आमिर कलिमले आफ्नो पहिलो ओभरको दोश्रो र तेश्रो बलमा क्रमश वसिम र २० बलमा १९ रन बनाएका मुस्तफाको विकेट निकाल्दै ओमानलाई खेलमा फर्काए । युएईको तर्फबाट वृत्य अरविन्दले १९, काशिफ दाउदले १३ तथा जुनियाद सिद्दिकीले तीन बलमा १० रन बनाए ।
ओमानका कलीमले चार ओभरमा २७ रन खर्चिएर सर्वाधिक पाँच विकेट लिए भने त्यस बाहेक बिलाल खान, कलीमउल्लाह र आयान खानले समान १-१ विकेट आफ्नो नाममा लेखाए ।