युएईका पुर्व कप्तान तथा टिमका महत्वपूर्ण अलराउण्डर रोहन मुस्तफाले नेपालका नवनियुक्त कप्तान सन्दिप लामिछानेलाई ओमानमा दवाब हुने बताएका छन् ।
नेपाली घरेलु फ्रेञ्चाइज लिगका लोकप्रिय खेलाडी मुस्तफाको युएईसँगै नेपाल, आयरल्याण्ड र ओमान शुक्रबारदेखि शुरु हुने चारदेशीय ट्वान्टी ट्वान्टी अन्तर्राष्ट्रिय श्रृंखला खेल्न गइरहेका छन् । त्यसपछि सबै टोलीले अर्को सातादेखि शुरु हुने आईसिसि ट्वान्टी ट्वान्टी बिश्वकप छनोट खेल्ने छन् ।
दुवै प्रतियोगिता सन्दिप कप्तान नियुक्त भएपछि नेपालको लागि पहिलो हुन गइरहेको छ । एकै पटक ठूलो प्रतियोगितामा कप्तानी गर्दा सन्दिपलाई गाह्रो हुन सक्ने मुस्तफाले बताए ।
“सन्दिपलाई दवाब हुनेछ किनभने कप्तानको रुपमा उनको पहिलो प्रतियोगिता नै निकै ठूलो छ । तर उनीसँग सिनियर खेलाडीहरु छन् जसले उनलाई मद्दत गर्नेछन्,” नेपाललाई निकै बलियो टोलीको रुपमा हेरेका मुस्तफाले भने ।
“नेपालको टिम अहिले एकदमै राम्रो छ । म नेपाली खेलाडीहरुसँग धेरै बर्षदेखि खेल्दै आइरहेको छु । नेपालले सोमपाल (तिब्र गतिका बलर सोमपाल कामी) र सन्यास लिएका पारस खड्कालाई मिस गर्नेछ । तैपनि बलियो छ । टोलीमा अझै पनि ज्ञानेन्द्र मल्ल छन्, ट्वान्टी ट्वान्टीका उत्कृष्ट खेलाडी करण केसी छन्, सन्दिप छन् र त्यसैले नेपाल निकै राम्रो छ,” उनले थपे ।
ओमानमा झण्डै एक साता बिताइसकेको युएई टोली उच्च फर्मममा रहेको छ । उसले आईसीसी क्रिकेट बिश्वकप लिग टुका तीन खेलहरुमा घरेलु टोलीलाई दुईमा हराएको थियो भने एकमा बराबरीमा रोकेको थियो ।