निर्धारित समयमा चुकेपनि सादियो मानेले टाई ब्रेकरमा निर्णायक पेनाल्टीमा गोल गरेपछि सेनेगल आफ्नो फुटबल इतिहासमा पहिलो पटक अफ्रिका महादेशको च्याम्पियन बनेको छ ।
क्यामरुनको राजधानी याउन्डेमा आइतबार भएको अफ्रिका कप अफ नेसन्सको फाइनलमा सेनेगलले ७ पटकको किर्तिमानी बिजेता तथा मानेका लिभरपुलका साथी मोहम्मद सलाहको इजिप्टलाई टाई–ब्रेकरमा ४–२ ले पराजित गर्यो ।
गोलकिपर मोहमद अबु गबालले मानेको पेनाल्टीलाई सातौं मिनेटमा बचाएपनि ओलेम्बे स्टेडियममा त्यसको फाइदा उठाउन नसक्दा इजिप्ट नकआउट सबै चारवटा खेलमा अतिरिक्त समय सम्म खेल्न पुग्यो । अतिरिक्त समयमा पनि कुनै गोल हुन नसक्दा खेलको निर्णाय टाई–ब्रेकरबाट भएको थियो ।
सलाहले इजिप्टको पाचौं पेनाल्टी प्रहार गर्न कुरे पनि मोहमद अब्देलमोनेमले बारमा प्रहार गर्नुका साथै मोहनाद लशिनको प्रहारलाई एडुवार्ड मेन्डीले बचाउदा लिभरपुल स्टारले अवसर नै पाएका थिएनन् । मानेले निर्णायक पेनाल्टीमा गोल गरेपछि सलाहले हारको दुखमा आँसु बगाएका थिए ।
पछिल्लो दुई पटक फाइनलमा पराजित भएको सेनेगल २००२ को बिश्वकपसँगै अफ्रिकाको बलियो टोलीको रुपमा उदाए पनि उसले अफ्रिका कप अफ नेसन्स जित्न सकेको थिएन । यस पटक भने इजिप्टलाई किर्तिमानी आठौं उपाधिबाट रोक्दा सलाह पहिलो पटक महादेशीय च्याम्पियन बन्नबाट बञ्चित हुन पुगे ।
“यदि तपाईले कडा मिहिनेत गर्ने हो भने तपाईले जे चाहनु हुन्छ पाउन हुन्छ भन्ने यो राम्रो उदाहरण हो । म निकै भावुक बनेको छु किन भने सेनेगलका जनताले यो उपाधिका लागि पछिल्लो ६० बर्षदेखि यो क्षणलाई कुर्दै आएका थिए,” सेनेगल प्रशिक्षक अलिउ सिस्सेले भने ।
पछिल्लो ११ संस्करणमा पाँच वटा फाइनल गोलरहित बराबरी भएपछि टाई–ब्रेकरमा च्याम्पियनको छिनाफाने भएको हो । इजिप्ट आइभोरी कोस्ट र आयोजक क्यामरुनसँग गोलरहित बराबरीमा रोक्किदै टाई–ब्रेकरमा बिजयी भए पनि यस पटक भने असफल भएको हो ।