म्यानचेस्टर युनाइटेडका ग्रिनउड अनिश्चितकालका लागि निलम्बनमा

मेसन ग्रिनउडले आफ्नी प्रेमिकालाई शारिरिक यातना दिनुका साथै यौन उत्पिडन गरेको घटना बाहिर आएपछि म्यानचेस्टर युनाइटेडले इंगल्याण्ड स्ट्राइकरलाई अनिश्चितकालका लागि निलम्बन गरेको छ ।

ग्रिनउडकी प्रेमिका ह्यारिएट रोब्सनले आफ्नो इन्स्टाग्राममाा आफूमाथि हमला गरेपछि लागेको चोटहरुको तस्विर देखाउनुका साथै यौन शोषण गर्दै गरेको अडियो क्लिप सार्वजनिक गरिदिएपछि उनी नराम्ररी फसेका हुन् ।

“अर्को सुचना जारी नभएसम्म मेसन ग्रिनउड प्रशिक्षणमा फर्कने छैनन् भने कुनै खेल पनि खेल्ने छैनन्,” युनाइटेडले एक बिज्ञप्ति जारी गर्दै भनेको छ । आइतबार बिहान पहिलो बिज्ञप्ति जारी गर्दा युनाइटेडले आफू सामाजिक सञ्जालमा बितरण भइरहेका तस्विर र आरोपबारे अवगत रहेको र तथ्य स्थापित नभएसम्म केही प्रतिकृया नदिने बताएको थियो ।

शरिरका बिभिन्न भागमा चोटको निशान रहेका दर्जनौ फोटो बिचलित गर्ने किसिमका छन् भने एक तस्विरमा ग्रिनउडकी प्रेमिकाको ओठको चोटबाट रगत बगिरहेको थियो । यो सबैको जिम्मेवार ग्रिनउड रहेको उनले आरोप लगाएकी छिन् ।

मेसन ग्रिनउडले मलाई के गर्छन् भनेर थाहा पाउन चाहेकाहरुका लागि यो फोटोहरु हालेको छु, उनले भनेकी छिन् । पोस्ट गरेको एक अडियो क्लिपमा एक व्यक्तिले महिलालाई यौन हिंसा गरेको सुनिन्छ । त्यसमा आवाज ग्रिनउड र उनी प्रेमिकाको रहेको दावी छ ।

हाल डिलिट भइसकेको सबै सामग्रीहरु सामाजिक सञ्जालमा सेभ भएका छन् ।

ग्रेटर म्यानचेस्टर पुलिसले यो घटना बाहिर आएपछि करिब २० बर्षका एक संदिग्धलाई पक्राउ गरेको सार्वजनिक गरेको छ । पहिचान गोप्य राखिएको संदिग्धलाई अहिले सोधपुँछ गरिरहेको र अनुसन्धान भइरहेको पुलिसले बताएको छ ।

ग्रिनउडको प्रायोजक नाइकीले एक बिज्ञप्ति जारी गर्दै भनेको छः “बिचलित गर्ने आरोपहरु प्रति हाम्रो ध्यानाकर्षण भएको छ । र यसलाई हामीले निकै नजिकबाट मोनिटर गरिरहेको छौं ।”