नेपाल क्रिकेट संघले २०२२ को लागि खेलाडीहरुको नयाँ ग्रेडिँग बिहिबार सार्वजनिक गर्दा युवा क्रिकेटर रोहित कुमार पौडेल फर्किएका छन् भने बिक्रम सोबलाई पहिलो पटक सेन्ट्रल कन्ट्रयाक्ट दिइएको छ ।
पछिल्लो दुई बर्ष रोहित सेन्ट्रल कन्ट्रयाक्ट बाहिर थिए भने बिक्रमसँगै उनले नेपालले सेप्टेम्बरमा गरेको ओमान भ्रमणमा राम्रो प्रदर्शन दिएका थिए । दुवै खेलाडीलाई ग बर्गको सेन्ट्रल कन्ट्रयाक्ट दिइएको हो । बिक्रम, रोहित र युवा तिब्र गतिका बलर गुल्शन झालाई क्यानले एक लाख प्रोत्साहन भत्ता पनि दिने भएको छ ।
यस्तै फास्ट बलिँग अलराउण्डर सोमपाल कामी ए ग्रेडमा फर्किएका छन् । पुरुषतर्फको सेन्ट्रल कन्ट्रयाक्टको क, ख र ग बर्गिकरणमा रहने खेलाडीहरुले क्रमश ५० हजार, ४० हजार र ३० हजार मासिक रुपमा पाउने छन् ।
क बर्गमा सन्दिप लामिछाने, ज्ञानेन्द्र मल्ल, दिपेन्द्र सिँह ऐरि, सोमपाल र करण केसी रहेका छन् । यस्तै ख बर्गमा कुशल भुर्तेल, आसिफ शेख, शरद भेषावकर, आरिफ शेख, अविनाश बोहोरा र बिनोद भण्डारी रहेका छन् ।
ग बर्गमा रहेका अन्य खेलाडीहरुमा कुशल मल्ल, कमल सिँह ऐरि, शाहब आलम, सुशन भारी र पवन शर्राफ रहेका छन् ।
महिला तर्फ अस्मिाना कर्माचार्य पहिलो पटक बर्गिकरणमा परेकी छिन् भने ज्योति पाण्डे पनि फर्किएकी छिन् । क्यानले ज्योतिलाई ख बर्गमा राख्दै ५० हजार प्रोत्साहन भत्ता पनि दिने निर्णय गरेको छ । अस्मिना ग बर्गमा अटाएकी हुन् ।
महिला टोलीको हकमा क, ख र ग बर्गका खेलाडीहरुलाई १५, १२ र १० हजार नगद दिइने गरिएको छ । रुबिना क्षेत्री, सिता रानामगर, इन्दु बर्मा, काजल श्रेष्ठ र करुणा भण्डारी क बर्गमा रहेका छन् ।
सरिता मगर, कविता कुँवर, अप्सरी बेगम, सरस्वती चौधरी, सबनम राई र ज्योति ख बर्गमा छन् । ग बर्गमा रहने खेलाडीहरुमा अस्मिनासँगै डली भट्ट, कविता जोशी, संगिता राई, रोमा थापा, ममता चौधरी र बिन्दु रावल रहेका छन् ।
क्यानले चोटका कारण मैदान बाहिर रहेका बायाँ हाते स्पिनर ललित नारायण राजबंशीलाई पनि डेढ लाख नगद सहयोग गर्ने निर्णय गरेको छ । यस्तै क्यानले आफ्नो बार्षिक साधारण सभा फाल्गुन १३ र १४ गते धनगढीमा गर्ने निर्णय पनि गरेको छ ।
