ट्वान्टी ट्वान्टी बिश्वकप छनोटको तैयारीमा रहेको नेपाली टोलीको प्रशिक्षणका लागि नेपाल क्रिकेट संघले भारतबाट दुई नेट बलर बोलाएको छ । तर आउने बित्तिकै एक बलर भने कोरोना संक्रमणका कारण आइसोलेसनमा गएका छन् ।
नेपाली टोली फेब्रुवरी १८ देखि ओमानमा हुने बिश्वकप छनोटका लागि तैयारी गर्दै आएको छ । नेपाली टिममै यसअघि चार जनालाई कोरोना संक्रमण रहेको र अहिले एक जना कोरोना मुक्त भने भइसकेका छन् ।
क्यानले ट्रेनबाट दुई भारतीय बलरलाई नेपाल ल्याएको हो । कोरोना संक्रमण नभएका बलरले भने सोमबार त्रिवि मैदानमा नेपाली ब्याट्स्म्यानहरुबिरुद्ध बलिँग गरेका थिए । दुवै तिब्र गतिका बलर रहेका छन् ।
प्रशिक्षक पुबुदु दासानायकेको अनुरोधमा नै क्यानले दुई नेट बलरहरुलाई भित्र्याएको हो । दासानायके यसअघि प्रशिक्षक रहँदा पनि नेपालको तैयारीका लागि दुई श्रीलंकन बलरहरुलाई नेटमा बलिँग गर्नका लागि बोलाएका थिए ।
बिश्वकप छनोट अघि नेपालले ओमानमै चार देश सम्मिलित ट्वान्टी ट्वान्टी श्रृंखला खेल्न गइरहेको छ । श्रृंखलामा नेपालले ओमान, युएई र आयरल्याण्डको सामना गर्नेछ ।
बिश्वकप छनोटमा नेपालको समुहमा ओमान, फिलिपिन्स र क्यानडा रहेका छन् । समुहबाट शिर्ष दुई टोली सेमिफाइनल पुग्ने छन् भने फाइनल पुग्ने दुवै टोली अष्ट्रेलियामा हुने बिश्वकपको लागि छनोट हुने छन् । अर्को समुहमा आयरल्याण्ड, युएई, बहराइन र जर्मनी रहेका छन् ।