अन्तिम ओभरमा अकिल हुसैनले २६ रन प्रहार गरे पनि इंग्ल्यान्डले वेस्ट इन्डिज विरुद्धको दोश्रो ट्वान्टी ट्वान्टी अन्तर्राष्ट्रिय खेलमा एक रनको रोमान्चक जित हात पारेको छ । जितसँगै पाँच खेलको शृंखला १-१ को अवस्थामा पुगेको छ ।
खेलमा टस हारेर पहिले ब्याटिङ गरेको इंग्ल्यान्डले २० ओभर खेल्दै आठ विकेटको नोक्सानीमा १७१ रनको चुनौतिपूर्ण योगफल तयार पार्यो । १७२ रनको लक्ष्य सहित ब्याटिङमा आएको वेस्ट इन्डिजले पुरै २० ओभर खेल्दै आठ विकेट गुमाएर १७० रन मात्र बनाउन सक्यो ।
१५ दशमलब एक ओभरमा ९८ रनको स्थितीमा आठ विकेट गुमाएर फराकिलो हारको संघारमा रहेको वेस्ट इन्डिजको लागि अकिलहुसैन र रोमारियो शेफर्डले २९ बलमा ७२ रनको साझेदारी गरे पनि जितका लागि पर्याप्त रहेन । वेस्ट इन्डिजका लागि अन्तिम ओभरमा जितका लागि ३० रन आवश्यक थियो । हुसैनले दुई चौका र तीन छक्का प्रहार गरे पनि इंग्ल्यान्डले एक रनको रोमान्चक जित हात पारेको हो ।
अविजित रहेका हुसैन र शेफर्डले समान ४४-४४ रनको पारी खेले । हुसैनले १६ बलमा चार छक्का र तीन चौका प्रहार गरे भने शेफर्डले २८ बलमा एक चौका र पाँच छक्का हिर्काए ।
वेस्ट इन्डिजका अन्य ब्याटरहरुमा निकोलस पुरन २४, ड्यारेन ब्राभो २३, शे होप दुई, ब्रेन्डन किंग शुन्य, कप्तान कायरनपोलार्ड र जेसन होल्डर समान १-१ रनमा पेभेलियन फर्किए ।
इंग्ल्यान्डकामोईन अलीले सर्वाधिक तीन विकेट लिए भने आदिल रशिदले दुई विकेट आफ्नो नाममा दर्ता गराए ।
यस अघि इंग्ल्यान्डको तर्फबाट ओपनर जेसन रोयले सर्वाधिक ४५ रन जोड्दा मोईन अलीले पनि ३१ रन प्रहार गरे । त्यस बाहेक क्रिस जोर्डनले २७ तथा अर्का ओपनर टम बान्टनले २५ रनको योगदान दिए भने अन्यले उल्लेख्य योगदान दिन सकेनन् ।