बार्सिलोनाको ब्ल्याकमेलमा घुँडा टेक्दिनः औस्माने डेम्बेले

क्लबका निर्देशक माटेउ एलेमेनीले जनवरीको अन्त्यमा क्लब छोड्नै पर्ने बताएपछि फ्रेञ्च विँगर औस्माने डेम्बेलेले आफू बार्सिलोनाको ब्ल्याकमेल सामु घुँडा नटेक्ने भन्दै जवाफ फर्काएका छन् ।

यसै समरमा डेम्बेलेको बार्सासँगको सम्झौता सक्किदै गर्दा खेलाडी र क्लबबीचको नयाँ सम्झौताको लागि भएको छलफल पनि असफल भएको थियो । एलेमेनीले बिहिबार बिहान डेम्बेले क्लबमा बस्न इच्छुक नरहेको स्पष्ट भएको र अब जनवरी ३१ अघि ट्रान्सफर हुनेमा आशावादी रहेको बताएका थिए ।

२०१७ मा जर्मन क्लब बोरुसिया डर्टमण्डबाट १ सय ५८ दशमलव ९ मिलियन डलरमा बार्सिलोना आएका डेम्बेलेलेलाई प्रशिक्षक जाभी हर्नान्डेजले बिहिबार एथ्लेटिक बिल्बाओबिरुद्धको खेलका लागि टिममै राखेका थिएनन् ।

“आजबाट सबै समाप्त हुन गइरहेको छ । कुनै पनि ब्ल्याकमेलसामु घुँडा नटेक्दै म इमान्दारिताका साथ जवाफ दिन गइरहेको छु । बार्सिलोनाको प्रोजेक्ट प्रति म कटिबद्ध रहेको नसोच्न म चेतावनी दिन्छु,” डेम्बेलेले आफुलाई लिएर चलिरहेको हल्लाहरुलाई लिएर आफ्नो सामाजिक सञ्जालमा लेखेका छन् ।

क्लबसँग अझै पनि सम्झौताको लागि वार्ता हुने हिन्ट दिएपनि डेम्बेलेले आफु भने क्लबमा बस्न चाहेको बिषयमा कुरै उठाएका थिएनन् । “नेगोसिएसन हुने बिषयमा सबैलाई थाहै छ । म यो कुरा आफ्नो एजेन्टलाई छोड्छु । मेरो एरिया भनेको फुटबलर र मैदान मात्रै हो । म त्यसैमा केन्द्रित छु,” उनले भने ।

बार्सा डेम्बेलेलाई सित्तैमा जान दिन चाहिरहेको छैन । एक बिलियन युरोभन्दा बढी ऋण रहेको बार्सिलोना २४ बर्षिय डेम्बेलेलाई अहिलेको ट्रान्सफर विन्डोमा बेच्दै राम्रो रकम बटुल्ने आशामा रहेको छ । “औसमाने र उनको एजेन्टसँग हामीले कुरा गर्न थालेको ६ महिना भन्दा बढी भइसकेको छ । हामीले बिभिन्न अफरहरु पनि दिइसकेको हो,” एलेमेनीले भने ।

केही बर्षयता निरन्तर चोटग्रस्त हुँदै आएका डेम्बेले क्याम्प नोउमा सोचे बिपरितको खेलाडी भएका छन् । क्लबको ऋण चुक्ता गर्न धेरै खेलाडी गुमाएको बार्सा डेम्बेलेलाई राख्न भने चाहन्छ । चोटकै कारण उनको प्रदर्शन निराशाजनक रहे पनि डेम्बेले बार्सिलोनाको सबैभन्दा प्रतिभावान खेलाडी पर्ने गरेका छन् ।