अमर सिँह रौटेलाले अन्तिममा केही महत्वपूर्ण इनिङ्गस खेलेपछि नेपाल एपिएफ क्लबले प्रधानमन्त्री कप ट्वान्टी ट्वान्टी राष्ट्रिय क्रिकेट प्रतियोगिताको उपाधिका लागि नेपाल पुलिस क्लबलाई १ सय ५८ रनको चुनौतिपूर्ण लक्ष्य दिएको छ ।
मँगलवार सेमिफाइनलमा त्रिुभवन आर्मी क्लबलाई २ सय ३० रन प्रहार गरेको एपिएफलाई फाइनलमा भने पुलिसले रोक्न सफल भयो । एपिएफ १९ दशमलव ५ ओभरमा १ सय ५७ रनमा अल आउट हुन पुग्यो ।
सेमिफाइनलमा आसिफ शेख, लोकेश बम र प्रदिप ऐरिले अद्र्धशतक बनाएपनि पुलिसको स्पिन आक्रमण सामु उनीहरुको खासै चल्न सकेन । प्रतियोगिताकै उच्च लयमा रहेका आसिफ भने दुई चौका प्रहार गरेपछि ९ रनमा गुल्सन झाको पहिलो ओभरमा आउट हुन पुगे ।
स्पिनर सागर ढकालले प्रदिप ऐरिलाई ७ रनमा बोल्ड गरे भने केही आकर्षक सट प्रहार गर्दै आफ्नो नियमित आक्रमक मुडमा देखिएका लोकेश बमलाई दिपेन्द्र सिँहले पेभिलियन फर्काए ।
मँगलवार १४ बलमै अद्र्धशतक प्रहार गरेका लोकेशले १५ बलमा २७ रन बनाउदा तीन छक्का र एक चौका प्रहार गरे । मिडल अर्डरमा शरद भेषावकरले मिडल अर्डर सम्हाल्ने प्रयास गरेपनि उनी १९ रनमै आउट हुन पुगे
भुवन कार्की (१७) र अमरले त्यसपछि आठौं विकेटका लागि ४० रनको साझेदारी गर्दै एपिएफलाई चुनौतिपूर्ण योगफल सम्म डोर्याएका थिए । अमरले १५ बलमा २९ रन बनाउदा तीन छक्का र दुई चौका प्रहार गरे ।
शरदले १९ रन बनाए भने सन्दिप जोराले २० बलमा २४ रन जोडेका थिए । उनले दुई चौका र एक छक्का हिर्काए ।
पुलिसका लागि दिपेन्द्र र सागरले समान तीन–तीन विकेट लिए । गुल्सनले दुई विकेट लिए ।