नेपाली स्टार लेग स्पिनर तथा कप्तान सन्दिप लामिछानेले एक पटक फेरि महत्वपूर्ण समयमा उत्कृष्ट प्रदर्शन गरेको खेलमा होबार्ट हुरिकेन्सले बिग ब्यास लिगको प्लेअफमा स्थान बनाएको छ ।
होबार्टले मँगलवारको रोमाञ्चक खेलमा मेलबर्न रेनेडेड्सलाई ६ रनले पराजित गर्यो । त्यसमा सन्दिपको प्रदर्शन उल्लेखनीय रह्यो ।
पहिलो ब्याटिँग गरेको होबार्टले कप्तान म्याथ्यु वेड र टिम डेभिडको उल्लेखनीय प्रदर्शनमा ५ विकेट गुमाउदै १ सय ८२ रन बनायो । रेनेगेड्सलाई हात ८ विकेट रहँदा नै अन्तिम ३६ बलमा ४९ रन चाहिएको अवस्थामा सन्दिप फर्किए र खेल मोडिने प्रदर्शन गरे ।
१५ औं ओभरमा उनले अद्र्धशतक प्रहार गरेर क्रिजमा खुट्टा जमाएर बसेका सन मार्सको विकेट लिदै मात्र पाँच रन खर्चिए । १८ औं ओभरमा फर्किएका सन्दिपले अर्को राम्रो प्रदर्शन गरे । यसपटक ८ रन खर्चदै सन्दिपले पहिलो पटक बिग ब्यास लिग खेलेका पुर्व भारती अण्डर १९ बिश्वकप बिजेता कप्तान उन्मुक्त चन्दलाई पेभिलियन फर्काए ।
१९ औं ओभरमा टप रोजर्सले तीन रन खर्चदै दुई विकेट लिएपछि रेनेगेड्स दवाबमा आयो । अन्तिम ६ बलमा १५ रन चाहिँदा राइली मेरडिथले ८ रनमात्र दिएपछि होबार्टले ६ रनको रोमाञ्चक जित हात पार्दै प्लेअफमा स्थान सुरक्षित गर्यो ।
पहिलो दुई ओभरमा १५ रन दिएका सन्दिपले चार ओभरमा २७ रन खर्चदै २ विकेट लिए । सन्दिपले बिग ब्यासमा सन्दिपले १३ खेलमा १४ विकेट हात पारिसकेका छन् । होबार्टले बुधबारको खेलमा मेलबर्न स्टार्सको सामना गर्नेछ ।
मँगलवार रेनेगेड्सका लागि कप्तान आरोन फिञ्चले ७५ रन बनाउदै दोश्रो विकेटका लागि मार्ससँग १ सय १ रनको साझेदारी गरेका थिए । फिञ्चले ५२ बलमा ६ चौका र चार चौका प्रहार गरे । यस्तै मार्सले ३८ बलमा ७ चौका र एक छक्काको मद्दतमा ५१ रन बनाए ।
यसअघि ओपनर कालेब जेवेलले ३५ रन बनाउदा वेडसँग दोश्रो विकेटका लागि ६७ रनको साझेदारी गरेका थिए । डार्स सर्टले मिडल अर्डरमा २२ बलमा ३७ रन जोडे भने होबार्टलाई चुनौतिपूर्ण योगफल डोर्याउन काम डेभिडले गरे ।
सिँगापुर ब्याट्स्म्यान डेभिडले २० बलमै नटआउट ४६ रन बनाएका थिए । उनको इनिङ्गसमा चार छक्का र दुई चौका सामेल थियो ।