उत्कृष्ट ब्याटिँग प्रदर्शन गरेको नेपाल एपिएफ क्लबलाई त्रिभुवन आर्मी क्लबलाई ४७ रनको फराकिलो अन्तरले पराजित गर्दै प्रधानमन्त्री कप ट्वान्टी ट्वान्टी राष्ट्रिय क्रिकेट प्रतियोगिताको फाइनलमा प्रवेश गरेको छ ।
त्रिवि मैदानमा आसिफ शेखको उत्कृष्ट इनिङ्गस र पुर्व आर्मी खेलाडी लोकेश बमको घरेलु ट्वान्टी ट्वान्टीकै सबैभन्दा तिब्र गतिको अद्र्धशतकमा एपिएफले आर्मीबिरुद्ध २ सय ३० रनको बिशाल योगफल खडा गर्यो ।
भिम सार्कीले छरितो शुरुवात दिलाएपनि आर्मीले २० ओभरमा ९ विकेट गुमाउदै १ सय ८३ रन बनायो । बुधबार नै हुने फाइनलमा एपिएफले अर्को बलियो टोली नेपाल पुलिस क्लबको सामना गर्नेछ ।
भिमले पहिलो विकेटका लागि पावरप्लेमै हरि बहादुर चौहन (२२) सँग ५५ रनको साझेदारी गरेका थिए । तर अर्को १५ रन जोड्ने क्रममा आर्मीले ५ विकेट गुमाउन पुग्यो । राजेश पुलामी मगर र सुमित श्रेष्ठ (२४) ले छैटौं विकेटका लागि ५७ रन जोडेपनि त्यो जितका लागि पर्याप्त भने रहेन ।
राजेशले २१ बलमा ३८ रन बनाउदा चार चौका र एक छक्का प्रहार गरे । यस्तै शाहब आलमले २१ रन बनाए । शरदले चार ओभरमा १६ रन खर्चिए भने भुवन कार्कीले पनि २ विकेट लिएका थिए ।
कप्तान शरद भेषावकरले दुवै ओपनर सहित तेश्रो नम्बरका तुल बहादुर थापाको विकेट लिए भने अविनाश बोहोराले एकै ओभरमा खतरा बन्न सक्ने कुशल मल्ल (७) र कप्तान बिनोद भण्डारी (१) लाई पेभिलयन फर्काउदै एपिएफको जितलाई लगभग सुनिश्चित पारेका थिए ।
यसअघि आशिफ र लोकेश बमले बिष्फोटक ब्याटिँग गर्दा आर्मी नीरिह साबित हुन पुग्यो । एपिएफले खेलमा २१ चौका र १६ छक्का प्रहार गरेको थियो । ती मध्ये ९ छक्का लोकेशकै नाममा रह्यो । लोकेशले १४ बलमै अद्र्धशतक पुरा गरेका थिए ।
एपिएफलाई उत्कृष्ट शुरुवात दिलाउने क्रममा आसिफले पहिलो विकेटका लागि प्रदिप ऐरिसँग १ सय ५० रनको बिशाल साझेदारी गरेका थिए । जारी पिएम कपमा प्रदिप र आसिफले दोश्रो पटक शतकीय साझेदारी गरेका हुन् ।
आसिफको विकेट पतनपछि लोकेशले एपिएफलाई बिशाल योगफल तिर डोर्याएका थिए । जितेन्द्र मुखियालाई एकै ओभरमा लगातार तीन छक्का प्रहार गरेका लोकेशले १८ बलमा ६६ रन बनाए । उनले दुई चौका पनि प्रहार गरेका थिए ।
नटआउट रहेका प्रदिपले ५३ बलमा ५७ रन बनाउदै ७ चौका र एक छक्का प्रहार गरे । आसिफले ४३ बलमा ८४ रन बनाए । उनको नाममा १० चौका र पाँच छक्का रह्यो ।
सुमित श्रेष्ठको बलमा स्टेडियम नै कटाउदै बिशाल छक्का प्रहार गरेका आसिफ अर्को बलमा अर्को ठूलो शट खेल्ने क्रममा आउट भएका थिए । खेल अवधिभर कुल २६ छक्का प्रहार भएको थियो ।