पुर्व त्रिभवुन आर्मी क्लब खेलाडी राजु रिजालले सुदुर पश्चिमका लागि प्रधानमन्त्री कपमा पाएको एक मात्र मौकामा आकर्षक इनिङ्गस खेल्दै आफ्नो पुरानो क्लबलाई सेमिफाइनलमा प्रवेश गराएका छन् ।
आइतबार त्रिवि मैदानमा जित्नै पर्ने खेलमा कप्तान सिद्धान्त लोहनी सहित दुई खेलाडी कोरोनाका कारण गुमाएको प्रदेश १ सुदुर पश्चिमसँग ७ विकेटले पराजित गर्यो । प्रदेश १ ले अन्तिम खेलमा नेपाल पुलिस क्लबसँग सोमबार खेल्दैछ तर उक्त खेलको कुनै औचित्य रहने छैन ।
आर्मी छोडेर आफ्नै प्रदेशमा लागेपछि पर्याप्त कागज पत्रको अभावमा शुरुको तीन खेल गुमाएका राजुले कप्तान सन्तोष भट्टसँग नयाँ जोडी बनाउदै बिशाल साझेदारी गरे । पहिलो ब्याटिङ्ग गरेको प्रदेश १ ले २० ओभरमा ९ विकेट गुमाउदै १ सय ५८ रन बनायो ।
जवाफमा राजु र सन्तोषले पहिलो विकेटका लागि ९८ रनको बिशाल साझेदारी गरेपछि सुदुर पश्चिमले १९ दशमलव १ ओभरमा तीन विकेटको क्षतिमा जित हात पार्यो । सुदुर भने यसअघि नै प्रतियोगिताबाट बाहिरिसकेको थियो ।
सुदुरको जितसँगै ५ अंक रहेको आर्मी समुह ए को उपबिजेताको रुपमा सेमिफाइनल प्रवेश गर्यो । सुदुर पराजित भएको खण्डमा प्रदेश १ र आर्मीबीचको निर्णय सोमबारको खेलले निर्णय गर्ने थियो ।
राजुले ५२ बलमा ९ चौका र दुई छक्काको मद्दतमा ६८ रन बनाए । सन्तोष ३९ बलमा ४८ रन बनाउदै आउट भए । उनको इनिङ्गसमा चार चौका र तीन छक्का सामेल थियो । राजुले खडक बोहोरा (८) सँग साझेदारी गरेपछि सुदुरले दुवै ब्याट्स्म्यानलाई गुमाएको थियो ।
अर्जुन साउदले ११ बलमा २६ रनको महत्वपूर्ण इनिङ्गस खेल्दै सुदुरको जित सुनिश्चित गरेका थिए । अर्जुनले तीन चौका र एक छक्का प्रहार गरे ।
यसअघि पहिलो ब्याटिङ्ग गरेको प्रदेश १ ले पावरप्लेको समाप्तिमा ६० रन जोडिसकेको थियो । उसको लागि मुकुन्द यादवले २७ बलमा ३४ र सोनु अन्सारीले २६ बलमा ३१ रन बनाए । दुवैले चार चौका र एक छक्का प्रहार गरे ।
दुई ओपनर मिनास थापा र अंकित सुबेदीले समान २३ रन बनाए । सुदुर पश्चिमका लागि हेमन्त धामी र नारायण जोशीले २–२ विकेट लिए ।